(વિનોદ ગાલા દ્વારા ભુજ) કચ્છમાં માર્ગ અકસ્માતની વણથંભી વણઝાર વચ્ચે આજે ત્રણ આશાસ્પદ યુવાનોનો ભોગ લેવાયો છે. મુન્દ્રા-અંજાર ધોરીમાર્ગ પરના ખેડોઇ ગામ નજીક આજે બપોરે કન્ટેનર ટ્રેલર અને એક્ટિવા વચ્ચે ગમખ્વાર અકસ્માત સર્જાયો છે. ટ્રેલરનું મહાકાય કન્ટેનર ઊથલીને એક્ટિવા ઉપર પડ્યું હતું. આ બનાવમાં એક્ટિવા પર સવાર ત્રણ લોકોના કમકમાટી ભર્યા મોત નિપજ્યા છે. મૃતદેહોને અંજાર સરકારી હોસ્પિટલમાં ખસેડવામાં આવ્યા છે. મૃતકોની ઓળખ હજી થઈ શકી નથી. આ ગમખ્વાર ઘટના અંગે અંજાર પોલીસે અકસ્માતના બનાવની વધુ તપાસ હાથ ધરી મૃતકોના નામ મેળવવાની કામગીરી હાથ ધરી છે.