( પ્રવિણ વ્યાસ દ્વારા ) મોરબી : નવયુગ કોલેજ, મોરબી  ખાતે વિદ્યાર્થીઓમાં સાયબર ક્રાઇમ અંગે જાગૃતિ ફેલાવવાના હેતુથી એક વિશેષ સેમીનારનું આયોજન કરવામાં આવ્યું હતું. આજના ડિજિટલ યુગમાં સોશિયલ મીડિયા, ઓનલાઇન ટ્રાન્ઝેક્શન અને ઈન્ટરનેટનો વધતો ઉપયોગ ધ્યાનમાં રાખીને વિદ્યાર્થીઓને સાયબર ક્રાઇમથી કેવી રીતે બચવું તે અંગે માર્ગદર્શન આપવું આ કાર્યક્રમનો મુખ્ય હેતુ હતો.

સેમીનારમાં નિષ્ણાત વક્તા તરીકે સાયબર સેલના અધિકારીઓ ઉપસ્થિત રહ્યા હતા. તેમણે સાયબર ક્રાઇમના વિવિધ પ્રકારો જેમ કે – ઓનલાઇન ઠગાઈ, ડેટા ચોરી, હેકિંગ, OTP ફ્રોડ, ફેક એકાઉન્ટ, તથા સોશિયલ મીડિયા દુરુપયોગ અંગે વિગતવાર માહિતી આપી. સાથે જ, સાયબર સુરક્ષા માટેના કાનૂની નિયમો તથા આપણી વ્યક્તિગત સુરક્ષા માટે અપનાવવાની જરૂરી સાવચેતી અંગે પણ માર્ગદર્શન આપ્યું.

વિદ્યાર્થીઓને સાયબર ક્રાઇમ અંગેની વાસ્તવિક ઘટનાઓના ઉદાહરણો બતાવીને જાગૃત કરવામાં આવ્યા. ઉપરાંત, શંકાસ્પદ પ્રવૃત્તિઓ જણાય તો “સાયબર હેલ્પલાઇન 1930” પર સંપર્ક કરવાની તથા સત્તાવાર વેબસાઇટ દ્વારા ફરિયાદ નોંધાવવાની માહિતી આપવામાં આવી.

કાર્યક્રમના અંતે વિદ્યાર્થીઓએ સક્રિય રીતે પ્રશ્નોત્તરી સત્રમાં ભાગ લીધો અને સાયબર સુરક્ષા અંગે મહત્વપૂર્ણ માહિતી મેળવી. કોલેજના પ્રિન્સિપાલ તથા સ્ટાફ દ્વારા આવા જાગૃતિ કાર્યક્રમો સતત યોજવાના સંકલ્પ સાથે કાર્યક્રમ સફળતાપૂર્વક પૂર્ણ થયો.