જોધપુર : રાષ્ટ્રીય સ્‍વયંસેવક સંઘ (આરએસએસ) ની ત્રણ દિવસીય અખિલ ભારતીય સમન્‍વય બેઠક તાજેતરમાં રાજસ્‍થાનના જોધપુર સ્‍થિત લાલસાગર ખાતે સંપન્ન થઈ. આ બેઠકમાં શિક્ષણ, સમાજ અને રાષ્ટ્રીય જીવનના વિવિધ પાસાઓ પર વિગતવાર ચર્ચા કરવામાં આવી, જેમાં ૩૨ જેટલા વિવિધ સંગઠનોના અખિલ ભારતીય અધિકારીઓએ ભાગ લીધો હતો. બેઠક બાદ આરએસએસ ના અખિલ ભારતીય પ્રચાર પ્રમુખ, સુનિલ આંબેકર, વિશ્વ સંવાદ કેન્‍દ્ર સૌરાષ્ટ્ર પ્રાંત દ્વારા આયોજિત પત્રકાર પરિષદમાં આ અંગે વિસ્‍તૃત માહિતી આપી હતી.

શિક્ષણ અને રાષ્ટ્રીય

શિક્ષણ નીતિ પર ભાર

સુનીલ આંબેકરે જણાવ્‍યું કે, બેઠકમાં શિક્ષણ ક્ષેત્રે વિશેષ ધ્‍યાન આપવામાં આવ્‍યું હતું. રાષ્ટ્રીય શિક્ષક મહાસંઘ, વિદ્યા ભારતી, શિક્ષા સંસ્‍કૃતિ ઉત્‍થાન ન્‍યાસ, ભારતીય શિક્ષણ મંડળ અને અખિલ ભારતીય વિદ્યાર્થી પરિષદ જેવા સંગઠનોએ નવી રાષ્ટ્રીય શિક્ષણ નીતિના અમલીકરણ અંગે પોતાના અનુભવો શેર કર્યા. પ્રાથમિકથી ઉચ્‍ચ શિક્ષણ સુધી માતૃભાષામાં અભ્‍યાસને પ્રોત્‍સાહન આપવા અને ભારતીય જ્ઞાન પરંપરાને શિક્ષણમાં સમાવવા માટે પુસ્‍તકોના પુનર્લેખન અને શિક્ષકોની તાલીમ પર પણ ભાર મૂકવામાં આવ્‍યો હતો.

સામાજિક પડકારો

અને તેના ઉકેલો

આ બેઠકમાં દેશની વર્તમાન સામાજિક પરિસ્‍થિતિઓ પર પણ ચર્ચા થઈ. પંજાબમાં વધી રહેલા ધર્માંતરણ અને યુવાનોમાં ડ્રગ્‍સના વ્‍યસન પર ચિંતા વ્‍યક્‍ત કરવામાં આવી હતી, જેના નિવારણ માટે સેવા ભારતી અને વિદ્યાર્થી પરિષદ દ્વારા ચલાવાતા અભિયાનોની માહિતી આપવામાં આવી. બાંગ્‍લાદેશી ઘૂસણખોરી અને પﾍમિ બંગાળમાં નાગરિક સુરક્ષા સંબંધિત પડકારો પર ગંભીર ચિંતા વ્‍યક્‍ત કરવામાં આવી, જ્‍યારે ઉત્તરપૂર્વીય રાજ્‍યોમાં હિંસામાં ઘટાડાને સકારાત્‍મક ગણાવ્‍યો. મણિપુરમાં સંવાદ આધારિત શાંતિ પ્રયાસોની પ્રશંસા કરવામાં આવી.

આદિવાસી સમાજ

અને રાષ્ટ્ર નિર્માણ

આદિવાસી વિસ્‍તારોમાં નક્‍સલવાદી અને માઓવાદી હિંસામાં ઘટાડો થયો છે, પરંતુ સમાજને ગેરમાર્ગે દોરવાના પ્રયાસો હજુ ચાલુ હોવાનું જણાવ્‍યું. વનવાસી કલ્‍યાણ આશ્રમ દ્વારા ચાલતા છાત્રાલયો અને આદિવાસી અધિકારો પરના કાર્યનો ઉલ્‍લેખ કરવામાં આવ્‍યો. ભારતીય પરંપરા અને રાષ્ટ્રીય વિચારોને આદિવાસી સમાજ સુધી પહોંચાડવાની જરૂરિયાત પર પણ ભાર મૂકવામાં આવ્‍યો.

શતાબ્‍દી વર્ષ અને

મહિલા સશક્‍તિકરણ

આરએસએસ ના શતાબ્‍દી વર્ષની યોજનાઓ વિશે વિગતવાર માહિતી આપતા, સુનીલ આંબેકરે કહ્યું કે પર્યાવરણીય સંરક્ષણ, કૌટુંબિક જ્ઞાન અને નાગરિક ફરજો જેવા વિષયો પર વિશેષ કાર્યક્રમો યોજાશે. શતાબ્‍દી વર્ષનું ઔપચારિક ઉદ્ધાટન ૨ ઓક્‍ટોબર ૨૦૨૫ ના રોજ નાગપુરમાં વિજયાદશમી ઉત્‍સવ સાથે થશે. મહિલાઓની ભાગીદારી પર ભાર મૂકતા તેમણે જણાવ્‍યું કે ક્રિડા ભારતી મહિલા ખેલાડીઓમાં યોગને પ્રોત્‍સાહન આપી રહી છે અને 'ઓપરેશન સિંદૂર' હેઠળ મહિલા કાર્યકરો દ્વારા ૮૮૭ કાર્યક્રમો યોજવામાં આવ્‍યા છે.

સમસ્‍યાઓનું

સમાધાન સંવાદથી

ધર્માંતરણ, ઘૂસણખોરી અને કાશી-મથુરા જેવા મુદ્દાઓ પર સુનીલ આંબેકરે સ્‍પષ્ટતા કરી કે આ સમસ્‍યાઓનો ઉકેલ સંઘર્ષ કે આંદોલન દ્વારા નહીં, પરંતુ કાનૂની અને પરસ્‍પર સંવાદ દ્વારા મળશે. તેમણે કહ્યું કે પ્રાથમિક શિક્ષણ માતૃભાષામાં હોવું જોઈએ અને બધી ભારતીય ભાષાઓનો આદર કરવો જરૂરી છે, જ્‍યારે અંગ્રેજીનો કોઈ વિરોધ નથી.

આ પત્રકાર પરિષદમાં જોધપુર પ્રાંત સંઘચાલક હરદયાલ વર્મા, અખિલ ભારતીય સહ-પ્રચાર પ્રમુખ નરેન્‍દ્ર ઠાકુર અને પ્રદીપ જોશી પણ ઉપસ્‍થિત રહ્યા હતા. બેઠકમાં લોક ગાયક અનવર ખાને પોતાનું પ્રદર્શન આપ્‍યું હતું અને સરસંઘચાલકે તેમનું સન્‍માન કર્યું હતું. સુનીલ આંબેકરે જણાવ્‍યું કે દેશની દિશા સકારાત્‍મક છે, જોકે કેટલાક વિષયો પર વધુ કામ કરવાની જરૂર છે.(૩૭.૭)

વિશ્વ સંવાદ કેન્‍દ્ર (સૌરાષ્ટ્ર પ્રાંત)