તા. ૬ સપ્ટેમ્બર ર૦ર૬ વિક્રમ સંવત ર૦૮૨ શ્રાવણ વદ – ૧૦ રવિવાર
નવલખી રોડ પર આવેલ પીપળીયા ચાર રસ્તા પાસે બિસ્માર રોડને પ્રશ્ને ચક્કાજામ
૧૦થી વધુ ગામોના સરપંચ, આગેવાનો અને લોકો જોડાયાઃ તંત્રને ૪૮ કલાકનું અલ્ટીમેટમ
(પ્રવિણ વ્યાસ દ્વારા) મોરબી, તા.૧૫: પીપળીયા ચાર રસ્તા પાસે સરપંચો અને આગેવાનો તેમજ સામાન્ય લોકોએ એકત્ર થઈને ચક્કાજામ કર્યો છે. અહીં બિસ્માર રોડને પગલે છેલ્લા ઘણા સમયથી લોકો હેરાન થઈ રહ્યા હોય, આજે બધાએ મળીને જનઆંદોલનનો રસ્તો અપનાવી તંત્રને ઢંઢોળવાનો પ્રયાસ કર્યો છે.
સ્થાનિકોના જણાવ્યા અનુસાર પીપળીયા ચાર રસ્તા આસપાસ હાઈવેની હાલત અતિ ખરાબ છે. જે અંગે અનેક રજૂઆતો કરી પણ કોઈ પરિણામ આવ્યું નથી. રોડ રીપેર તો કરે છે પણ જેવું તેવું કામ કરવામાં આવતું હોવાથી પરિસ્થિતિ ફરી પહેલા જેવી જ થઈ જાય છે. આ હલાકીને કારણે બરવાળા, ખાખરાળા, લૂંટાવદર, નાના દહીંસરા, ગૂંગણ, ડેરાળા, ખેવારિયા, પીપળીયા, માનસર, ખારચિયા સહિતના દશેક ગામોના સરપંચો, આગેવાનો અને સામાન્ય લોકોએ એકત્ર થઈ પીપળીયા ચાર રસ્તા ઉપર સનાતન હોટેલ સામે હાઇવે ઉપર ચક્કાજામ કર્યો છે.
વધુમાં સ્થાનિકોએ ઉમેર્યું કે મુખ્યમંત્રી સુધી રજુઆત કરી છે પણ રોડની હાલત સુધરી નથી. આ રોડ ઉપર ધૂળ પણ એટલી ઉડે છે. રોડની એક સાઈડમાં મસ મોટા ખાડાઓ હોવાથી બધા વાહન એક સાઈડમાં જ ચાલે છે. જેથી અહીં અનેકવાર અકસ્માત પણ સર્જાયા છે. પરિવારના કોઈ સભ્ય આ રોડ ઉપરથી બાઇક લઈને જવાના હોય ત્યારે તે ઘરે પરત ફરે તો જ ફરે. એટલી જોખમી હાલત છે.
અંતમાં સ્થાનિકોએ જણાવ્યું કે ધારાસભ્ય એક વાર પીપળીયા ચાર રસ્તાથી મોરબી સુધી બાઈક લઈને જઈ બતાવે. અહીં બાઈક લઈને જતા હોય ત્યારે જો કોલસા કે પાઉડર કે અન્ય વસ્તુ ભરેલો ટ્રક આગળ હોય ત્યારે તેની પાછળ બાઈક ચલાવવું એટલે લોઢાના ચણા ચાવવા જેવું અઘરું છે. વધુમાં સ્થાનિકોએ તંત્રને ૪૮ કલાકનું અલ્ટીમેટમ આપ્યું છે. જો આ દરમિયાન રોડ રિપેરની કામગીરી શરૂ ક૨વામાં નહિ આવે તો ફરી આંદોલન ક૨વામાં આવશે.
(2:01 PM IST)
છેલ્લા 8 દિવસમાં સૌથી લોકપ્રિય 
