જૂનાગઢ: ગિરનાર પર્વત પર આવેલા ગોરખનાથ શિખરના મંદિરમાં તાજેતરમાં થયેલી તોડફોડ અને મૂર્તિ ખંડિત કરવાની ગંભીર ઘટના બાદ આજે સનાતન અને જૈન ધર્મના સંતો-મહંતોએ એક મહત્ત્વપૂર્ણ અને ઐતિહાસિક નિર્ણય લીધો છે. ગૌરક્ષનાથ આશ્રમ ખાતે પોલીસ અધિકારીઓના સન્માન સમારોહમાં સંતોએ સર્વસંમતિથી જાહેરાત કરી કે, ભવિષ્યમાં આવી કોઈ અનિચ્છનીય ઘટના ન બને તે માટે ગિરનાર પર્વત પરના તમામ ધાર્મિક સ્થળોએ સ્વખર્ચે આધુનિક CCTV કેમેરા લગાવવામાં આવશે.
તોડફોડના કેસનો ભેદ ઉકેલવા બદલ પોલીસ અધિકારીઓ અને કર્મચારીઓનું સન્માન કરાયું હતું. આ પ્રસંગે જૈન સંત નમ્રમુનિજી એ સનાતન અને જૈન સમાજ એક જ હોવાનો ભાવ વ્યક્ત કર્યો, જેને મહંત શેરનાથબાપુ (ગૌરક્ષનાથ આશ્રમ) અને કરશનદાસબાપુ (પરબધામ) સહિતના સંતોએ હર્ષભેર વધાવ્યો હતો.
ગિરનારની સુરક્ષાને મજબૂત બનાવવાના આ ભગીરથ કાર્ય માટે સંતોએ તાત્કાલિક આર્થિક યોગદાનની જાહેરાત કરી:
 જૈન સંતો: તેમણે તત્કાળ રૂ. ૨૫ લાખનું માતબર યોગદાન જાહેર કર્યું.
 સનાતન સંતો: ભવનાથ ક્ષેત્ર, સતાધાર, પરબ સહિતના તમામ સનાતન ધર્મના સંતોએ પણ આ કાર્યમાં યથાયોગ્ય આર્થિક યોગદાન આપવાની જાહેરાત કરી.
સર્વસંમતિથી લેવાયેલા આ નિર્ણય મુજબ, ગમે તેટલો ખર્ચ થાય, પરંતુ ગિરનારની મુખ્ય સીડી, પાછળની સીડી અને જંગલ સહિતનો સમગ્ર વિસ્તાર સીસીટીવી કેમેરાના કવરેજ હેઠળ લાવવામાં આવશે, જેથી ગિરનારની પવિત્રતા અને સુરક્ષા જળવાઈ રહે.