જામનગર: શહેરના પોશ વિસ્તાર ગણાતા પંચેશ્વર ટાવર નજીક રોડ પર 61 વર્ષના ઢગાએ માત્ર 4 વર્ષની બાળકીને શારીરિક અડપલાં કર્યા હોવાની ચોંકાવનારી ઘટના હાલ સામે આવી રહી છે. જોકે આ મામલે પોલીસને ફરિયાદ મળતા પોલીસે આસપાસના CCTVને આધારે તપાસ કરી આ 61 વર્ષના ઢગાને દબોચી લીધો છે અને તેની સામે કાયદેસરની કાર્યવાહી હાથ ધરી છે.

મળતી માહિતી મુજબ, આ નરાધમ ઢગાની ઓળખ પ્રકાશદાન નામે થઈ છે, જે પંચેશ્વર ટાવર નજીક રોડ પર એક દુકાનના ઓટલે બેઠેલો હતો, ત્યારે અહીં મજૂરી કરતા એક પરપ્રાંતીય વ્યક્તિની માત્ર 4 વર્ષની કુમળી દીકરી સાથે આવું જઘન્ય કૃત્ય કર્યું હતું. ધરડો બાવાજી જેવા દેખાતા આ માણસે દીકરીને રમાડવાનું કહી તેને ગાલ પર ચૂંબન કર્યું હતું અને બાદમાં ખોળામાં બેસાડી જાતીય સતામણી કરી હતી.

આ અંગેની જાણ થતા જ ત્યાં સ્થાનિક એક વ્યક્તિ દોડી આવ્યો હતો અને દીકરીને છોડાવી હતી, ત્યારબાદ આ ઢગો ત્યાંથી ભાગી છૂટ્યો ગયો હતો. ત્યારે આ સમગ્ર ઘટના સીસીટીવીમાં પણ કેદ થઈ હતી. જે બાદ આ મામલે જામનગર સીટી એ ડિવિઝન પોલીસમાં ફરિયાદ નોંધાઈ હતી અને પોલીસે ભારતીય ન્યાય સંહિતા 2023ની કલમ 74,75(2) તથા પોક્સો એક્ટ કલમ 8,12 મુજબનો ગુનો દાખલ કર્યો હતો