જુનાગઢના વિસાવદર તાલુકાના શોભાવડલા ગામમાં એક અત્યંત સનસનાટીપૂર્ણ અને હૃદય કંપાવી દેનારી હત્યાની ઘટના સામે આવી છે. અહીં એક સગીર વયના યુવાને પોતાના સગા મોટાભાઈ અને સાત મહિનાની ગર્ભવતી ભાભીની નિર્મમ હત્યા કરીને બંને મૃતદેહોને ઘરની નજીક જ દાટી દીધા હતા. પોલીસે ગણતરીના દિવસોમાં જ આ ડબલ મર્ડર નો ભેદ ઉકેલી કાઢ્યો છે. 

વિસાવદર તાલુકાના શોભાવડલા ગામમાં આવેલા ખોડીયાર આશ્રમ ખાતે છેલ્લા 28 વર્ષથી પરપ્રાંતીય પરિવાર વસવાટ કરતો હતો. આ પરિવારમાં માતા વિભાબેન, મૃતક મોટો પુત્ર શિવમગીરી (ઉં.વ. 22, ઇલેક્ટ્રિશિયન), તેની મૃતક પત્ની કંચન કુમારી (ઉં.વ. 19, 7 મહિના ગર્ભવતી) અને એક સગીર નાનો દીકરો હતા. મોટો દીકરો શિવમ બહારનું કામ કરતો હતો, જ્યારે સગીર ભાઈ આશ્રમ અને ગૌશાળાનું કામ સંભાળતો હતો. સગીર દીકરાને દારૂની લત હતી અને આ કારણે તે અવારનવાર ઘરમાં ઝઘડા કરતો હતો. આ જ કૌટુંબિક ઝઘડાએ એક દિવસ ખૂની ખેલ સર્જ્યો.

આશરે બાર દિવસ પહેલા, માતા વિભાબેન જ્યારે બહાર ગયા હતા, ત્યારે સવારે શિવમગીરી સૂતો હતો. આ તકનો લાભ લઈને સગીર ભાઈએ તેના માથા પર લોખંડનો પાઇપ (Iron Pipe) મારીને તેની હત્યા કરી નાંખી. આ સમગ્ર કૃત્ય શિવમગીરીના પત્ની કંચન કુમારીએ જોઈ લીધું. ભાભી કંચન કુમારી આ વાત કોઈને જણાવી દેશે તેવા ડરથી સગીરે તેમની પણ ઘાતકી હત્યા કરી નાંખી. મૃતક કંચન કુમારી ૭ મહિનાના ગર્ભ સાથે હોવાથી, આ હત્યામાં માતા-પિતા સાથે એક અજાત શિશુનું પણ મૃત્યુ થયું. હત્યા કર્યા બાદ સગીર આરોપીએ ભાઈ-ભાભીના મૃતદેહને આશ્રમ નજીક જ આવેલા એક વાડામાં ઊંડો ખાડો (Dug a Deep Pit) કરીને દાટી દીધા હતા.

ગુનાને અંજામ આપ્યાના લગભગ 6 દિવસ પછી, 21 ઓક્ટોબરે, હત્યારા સગીર અને તેની માતાએ ભેગા મળીને મૃતક પુત્રવધૂના પિતાને ફોન કર્યો. તેમણે ખોટું જણાવ્યું કે, "દીકરી અને જમાઈનો ગંભીર અકસ્માત થયો છે અને બંને મૃત્યુ પામ્યા છે, તેથી તેમના અંતિમ સંસ્કાર પણ કરી દેવાયા છે."

જોકે, મૃતક મહિલાના પરિવારજનોને આ વાત ગળે ન ઉતરી. કંચન કુમારીના ભાઈ લલન કુમારે પોલીસને જણાવ્યું કે, જ્યારે તેમણે અકસ્માતના ફોટા માંગ્યા, ત્યારે આરોપીઓ ગોળગોળ વાતો કરવા લાગ્યા અને જૂના અકસ્માતોના ફોટા મોકલ્યા. આનાથી તેમને શંકા ગઈ અને તેમણે વિસાવદર પોલીસનો સંપર્ક કર્યો.

મૃતક કંચન કુમારીના પરિવારે વિસાવદર પોલીસને જાણ કરી. પોલીસે ગુમસુદાની નોંધ કરીને તપાસ શરૂ કરી અને શંકાના આધારે આશ્રમ ખાતે તેમના નિવાસસ્થાને પહોંચી. પોલીસની સઘન પૂછપરછમાં આખરે સગીર આરોપી ભાંગી પડ્યો અને તેણે ડબલ મર્ડર કર્યાની કબૂલાત કરી