ધ્રાંગધ્રા,તા.૨૭

ધ્રાંગધ્રા તાલુકાના જસમતપુર ગામ પાસે આવેલી નર્મદા કેનાલમાં એક અત્યંત કરૃણ ઘટના બની છે. જસમતપુર ગામના રહેવાસી મહેશભાઈ મફાભાઈ દાદરેજાએ પોતાના ૮ વર્ષના પુત્ર દેવરાજ સાથે કેનાલમાં છલાંગ લગાવીને આત્મહત્યા કરી હોવાનું સામે આવ્યું છે. કોઈક અગમ્ય કારણોસર પિતાએ પોતાના પુત્ર સાથે કેનાલમાં ઝંપલાવ્યું હતું. જેના કારણે બંનેનું મોત નીપજ્યું છે.

આ ઘટનાની જાણ થતાં જ વિસ્તારમાં શોકનું મોજુ ફરી વળ્યું છે. ઘટનાની જાણ થતા જ ધ્રાંગધ્રા નગરપાલિકાની ફાયર બ્રિગેડની ટીમ અને તાલુકા પોલીસ ઘટનાસ્થળે દોડી આવી હતી. હાલમાં ફાયર બ્રિગેડ દ્વારા નર્મદા કેનાલના ઊંડા પાણીમાં પિતા-પુત્રની લાશની શોધખોળ હાથ ધરવામાં આવી છે. પોલીસે આત્મહત્યા પાછળનું ચોક્કસ કારણ જાણવા તપાસ શરૃ કરી છે.