માંડવી (કચ્છ): કચ્છના ઐતિહાસિક અને મનોહર માંડવી બીચ પર આજથી પ્રવાસન અને ઉત્સાહનો નવો અધ્યાય શરૂ થવા જઈ રહ્યો છે. ગુજરાતના ગૃહ અને નાયબ મુખ્યમંત્રી હર્ષ સંઘવી આજે સાંજે 6:00 કલાકે ભવ્ય 'માંડવી બીચ ફેસ્ટિવલ 2025' ને ખુલ્લો મૂકશે. આ પ્રસંગે પ્રવાસન મંત્રી ડૉ. જયરામ ગામીત અને મહાનુભાવ ત્રિકમભાઈ છાંગા સહિતના નેતાઓ ઉપસ્થિત રહી કચ્છના પ્રવાસનને નવી ઊંચાઈ આપશે. 21 ડિસેમ્બરથી શરૂ થઈને 31 ડિસેમ્બર સુધી ચાલનારો આ ઉત્સવ ખાસ કરીને નવા વર્ષની ઉજવણી માટે આવતા પ્રવાસીઓ માટે આકર્ષણનું મુખ્ય કેન્દ્ર બનશે.
માંડવી બીચ તેની સોનેરી રેતી અને શાંત મોજાઓ માટે વિશ્વભરમાં જાણીતો છે, પરંતુ આ ફેસ્ટિવલ દરમિયાન અહીંની રોનક કંઈક અલગ જ હશે. પ્રવાસીઓ માટે દરરોજ સાંજે સાંસ્કૃતિક કાર્યક્રમોનું આયોજન કરવામાં આવ્યું છે, જેમાં વીકેન્ડ પર નામાંકિત કલાકારો પોતાના સૂર રેલાવશે. આ ઉપરાંત, રાત્રિના સમયે આકાશને ઝગમગાવતો લેસર લાઈટ શો અને રેતી પર કંડારેલી અદભૂત કલા (Sand Art) મુલાકાતીઓને મંત્રમુગ્ધ કરી દેશે. બાળકોથી લઈને મોટેરાઓ માટે સ્ટારગેઝિંગ અને બોનફાયર જેવી પ્રવૃત્તિઓ પણ આ વખતે ખાસ આકર્ષણ જમાવશે.
સાહસના શોખીનો માટે આ ફેસ્ટિવલ એક ખજાના સમાન છે. બીચ પર ઝોર્બિંગ, કમાન્ડો નેટ, બર્મા બ્રિજ અને વોટર સ્પોર્ટ્સ જેવી એડવેન્ચર એક્ટિવિટીઝ ગોઠવવામાં આવી છે. સાથે જ બીચ વોલીબોલ અને ફૂટબોલ જેવી સ્પર્ધાઓ પણ યોજાશે. કચ્છની પ્રખ્યાત હસ્તકલાના સ્ટોલ્સ અને મોંમાં પાણી લાવી દે તેવી કચ્છી વાનગીઓના ફૂડ કોર્ટ પ્રવાસીઓને એક સંપૂર્ણ 'વેકેશન પેકેજ' નો અનુભવ કરાવશે. સુરક્ષા અને સુવિધા માટે તબીબી ટીમ અને લોખંડી પોલીસ બંદોબસ્ત પણ તૈનાત કરવામાં આવ્યો છે.
આ ફેસ્ટિવલ માત્ર મનોરંજન નથી, પરંતુ માંડવીના ઐતિહાસિક વારસાને વિશ્વ ફલક પર મૂકવાનો પ્રયાસ છે. મુલાકાતીઓ બીચની મજા માણવાની સાથે શાહી વિજય વિલાસ મહેલ અને જહાજ નિર્માણના પૌરાણિક ઉદ્યોગની પણ મુલાકાત લઈ શકશે. 31મી ડિસેમ્બરની રાત્રે અહીં ભવ્ય આતશબાજી સાથે નવા વર્ષને આવકારવામાં આવશે. જો તમે હજુ સુધી વેકેશનનું આયોજન નથી કર્યું, તો માંડવીનો આ દરિયાકિનારો તમારી રાહ જોઈ રહ્યો છે.