​(મુકુંદ બદિયાણી દ્વારા)જામનગર તા.૦૩ 

૭૯–જામનગર (દક્ષિણ) વિધાનસભા મતદાર વિભાગમાં મતદારયાદી ખાસ સઘન સુધારણા કાર્યક્રમ અંતર્ગત આગામી તા. ૦૪ જાન્યુઆરી, ૨૦૨૬ (રવિવાર)ના રોજ ખાસ ઝુંબેશ હાથ ધરવામાં આવનાર છે. જોકે, આ દિવસે નિર્ધારિત કેટલાક મતદાન મથકો ખાતે સ્પર્ધાત્મક પરીક્ષાઓના કેન્દ્રો કાર્યરત હોવાથી પરીક્ષાર્થીઓની સુવિધા અને કાયદો-વ્યવસ્થા જળવાઈ રહે તે હેતુથી વહીવટી તંત્ર દ્વારા એક દિવસ માટે ચાર મતદાન મથકોમાં વૈકલ્પિક વ્યવસ્થા કરવામાં આવી છે.

​જે અંતર્ગત, નેશનલ હાઇસ્કૂલનું વૈકલ્પિક મતદાન મથક સમસ્ત હાલારી ભાનુશાળી જ્ઞાતિની વાડી, પવનચકી પાસે રહેશે. શ્રી એલ.જી. હરિયા સ્કુલનું વૈકલ્પિક મતદાન મથક પ્રાથમિક શાળા નં.૧૦/૩૭, જુનો હુડકો, રણજિતનગર ખાતે તેમજ શ્રી જેકુરબેન સોની કન્યા વિદ્યાલયનું વૈકલ્પિક મતદાન મથક પ્રાથમિક શાળા નં.૫૬/૬૦, કૃષ્ણનગર-૩ ખાતે કાર્યરત રહેશે. આ ઉપરાંત, શ્રી પ્રણામી હાઈસ્કુલનું વૈકલ્પિક મતદાન મથક શ્રી પાનીબેન મારું બાલમંદિર, જામનગર ખાતે રાખવામાં આવ્યું છે.

​રવિવારના એક દિવસ દરમિયાન સંબંધિત વિસ્તારના મતદારોએ આ વૈકલ્પિક મતદાન મથકોનો ઉપયોગ કરવા અને ચૂંટણી પ્રક્રિયામાં વહીવટી તંત્રને પૂરતો સહયોગ આપવા ૭૯–જામનગર (દક્ષિણ) વિધાનસભા મતદાર વિભાગના મતદાર નોંધણી અધિકારીશ્રી દ્વારા અપીલ કરવામાં આવી છે.