તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
ધ્રોલના ખારવા ગામે મકરસંક્રાંતિના પર્વે માનવતાની મહેકઃ યુનિટી પ્લસ હોસ્પિટલ દ્વારા ૧૫૦૦ શ્રમિકોને ભોજન કરાવાયું
માત્ર આકાશમાં પતંગ નહીં, ગરીબોના ચહેરા પર સ્મિત લહેરાવ્યું: યુનિટી પ્લસ હોસ્પિટલની સરાહનીય કામગીરી
(સંજય ડાંગર દ્વારા) ધ્રોલ,તા.૧૫: દાન-પુણ્ય અને પરોપકારના પવિત્ર પર્વ મકરસંક્રાંતિ (ઉત્તરાયણ) ની ધ્રોલ પંથકમાં ભક્તિભાવ પૂર્વક ઉજવણી કરવામાં આવી હતી. આ શુભ દિવસે ધ્રોલની જાણીતી યુનિટી હોસ્પિટલના ડો. જીગ્નેશભાઈ હિરાણી તથા ડો. દિપ્તીબેન હિરાણી દ્વારા સામાજિક ઉત્તરદાયિત્વના ભાગરૂપે એક પ્રેરણાદાયી સેવાકાર્યનું આયોજન કરવામાં આવ્યું હતું.
ધ્રોલ તાલુકાના ખારવા ગામે આવેલ પૌરાણિક અને શ્રદ્ધાના કેન્દ્ર સમાન નાગબાઈ માતાજીના મંદિરે મકરસંક્રાંતિ ઉત્તરાયણ દિવસે બપોરે ભોજન પ્રસાદનો કાર્યક્રમ યોજાયો હતો. જેમાં ખારવા તથા આજુબાજુના ગ્રામ્ય વિસ્તારમાં મજૂરી કામ કરતા અંદાજે ૧૫૦૦ જેટલા ખેત મજૂરો અને જરૂરિયાતમંદ પરિવારોને હોંશે હોંશે ભોજન કરાવવામાં આવ્યું હતું. મકરસંક્રાંતિના પાવન દિવસે માતાજીના સાનિધ્યમાં શ્રમિકોના જઠરાગ્નિ તળપ્ત કરી ડોક્ટર દંપતીએ સેવા એ જ ધર્મના મંત્રને સાર્થક કર્યો હતો.
આ તકે યુનિટી પ્લસ હોસ્પિટલનો મેડિકલ સ્ટાફ તેમજ ખારવા ગામના અગ્રણીઓ અરવિંદભાઈ હિન્સુ, મહેશભાઈ ચીખલીયા સહિતના આગેવાનો વિશેષ ઉપસ્થિત રહ્યા હતા અને સેવાકાર્યમાં સહભાગી બન્યા હતા. તહેવારોના દિવસે મોજ-મજાની સાથે સમાજના છેવાડાના માનવીને યાદ કરી હોસ્પિટલ દ્વારા કરવામાં આવેલી આ કામગીરીની ગ્રામજનો અને પંથકના લોકોએ ભારોભાર પ્રશંસા કરી હતી.
(9:55 AM IST)
છેલ્લા 8 દિવસમાં સૌથી લોકપ્રિય 
