ભાવનગર :પશ્ચિમ રેલવેના ભાવનગર મંડળ દ્વારા મુસાફરોની સુવિધાને ધ્યાનમાં રાખીને એક મહત્વપૂર્ણ જાહેરાત કરવામાં આવી છે. મુંબઈ મંડળમાં ચાલી રહેલા ઓપરેશનલ કામકાજને કારણે ટ્રેન વ્યવહારમાં જે ફેરફારોની આશંકા હતી, તે હવે દૂર થઈ ગઈ છે. ટ્રેન નંબર 19218 વેરાવળ–બાંદ્રા ટર્મિનસ એક્સપ્રેસ તેના નિયમિત સમયપત્રક મુજબ જ કાર્યરત રહેશે.

ભાવનગર મંડળના વરિષ્ઠ મંડળ વાણિજ્ય પ્રબંધક અતુલ કુમાર ત્રિપાઠીના જણાવ્યા અનુસાર, મુંબઈ મંડળમાં પ્રસ્તાવિત ઓપરેશનલ કામ નિર્ધારિત સમય મર્યાદા પહેલા જ સફળતાપૂર્વક પૂર્ણ કરી લેવામાં આવ્યું છે. આ અગાઉ આ કામને કારણે ટ્રેનના સંચાલન પર અસર પડવાની શક્યતા હતી, પરંતુ હવે કામ પૂર્ણ થઈ જતાં ટ્રેન વ્યવહારને અસર નહીં થાય.

તારીખ 16 જાન્યુઆરી, 2026થી ટ્રેન નંબર 19218 (વેરાવળ–બાંદ્રા ટર્મિનસ એક્સપ્રેસ) તેના નિર્ધારિત સમય, માર્ગ અને સ્ટોપેજ મુજબ સામાન્ય રીતે ચાલશે. રેલવે દ્વારા સ્પષ્ટતા કરવામાં આવી છે કે:

આ ટ્રેન માટે અગાઉ જાહેર કરવામાં આવેલા કોઈપણ પ્રકારના 'પુનર્નિર્ધારણ' (Rescheduling) કે 'નિયમન' હવે રદ ગણવામાં આવશે.

મુસાફરોએ અગાઉની સૂચનાઓને ધ્યાને ન લેતા મૂળ સમયપત્રક મુજબ મુસાફરીનું આયોજન કરવું.

આ ટ્રેન દૈનિક (Daily) ચાલે છે. તે વેરાવળથી રાત્રે 11:50 કલાકે ઉપડે છે. જે બાંદ્રા ટર્મિનસ બીજા દિવસે બપોરે 1:20 કલાકે પહોંચે છે.