સોમનાથ : મહાશિવરાત્રીના પાવન પર્વે પ્રથમ જ્યોતિર્લિંગ સોમનાથ મહાદેવના સાનિધ્યમાં ભક્તિ અને શક્તિનો અનોખો સંગમ જોવા મળ્યો હતો. ગિરિરાજ સોમનાથની પવિત્ર ભૂમિ પર જ્યારે આખું વિશ્વ શિવમય બન્યું છે, ત્યારે સોમનાથના પવિત્ર ત્રિવેણી સંગમ ખાતે યોજાયેલી ભવ્ય મહાઆરતીએ શ્રદ્ધાળુઓને આધ્યાત્મિક વિભૂતિનો અનુભવ કરાવ્યો હતો.
ત્રિવેણી સંગમે આસ્થાની રોશની
પૌરાણિક મહત્વ ધરાવતી કપિલા, હિરણ્ય અને સરસ્વતી નદીઓના પવિત્ર સંગમ સ્થાને સ્થાનિક બ્રહ્મ સમાજ દ્વારા મહાઆરતીનું સુંદર આયોજન કરવામાં આવ્યું હતું. હજારો ભક્તોની હાજરીમાં જ્યારે એકસાથે સેંકડો દીવાઓ પ્રગટાવવામાં આવ્યા, ત્યારે નદીનું જળ પણ દીવડાઓના પ્રકાશથી ઝળહળી ઉઠ્યું હતું. મંત્રોચ્ચાર અને શંખનાદથી સમગ્ર ગીર સોમનાથ પંથક શિવભક્તિમાં લીન થયો હતો. આ પ્રસંગે સાંસદ રાજેશભાઈ ચુડાસમા, ધારાસભ્ય ભગવાનભાઈ બારડ અને જિલ્લા કલેકટર સહિતના ઉચ્ચ અધિકારીઓએ મહાદેવની આરતી કરી ધન્યતા અનુભવી હતી.
સોમનાથ ટ્રસ્ટ દ્વારા વિશેષ આયોજન
ત્રિવેણી સંગમનું વિશેષ મહત્વ છે કારણ કે આ એ જ ભૂમિ છે જ્યાં ભગવાન શ્રીકૃષ્ણએ દેહોત્સર્ગ કર્યો હતો. મહાશિવરાત્રી નિમિત્તે સોમનાથ ટ્રસ્ટ દ્વારા વહેલી સવારથી જ પ્રભાત ફેરી, પાલખી યાત્રા અને ચાર પ્રહરની વિશેષ પૂજા-અર્ચનાનું આયોજન કરવામાં આવ્યું છે. ભક્તો માટે પીવાના પાણી, સુરક્ષા અને સુચારુ દર્શનની વ્યવસ્થા માટે વહીવટી તંત્ર અને પોલીસ દ્વારા ચુસ્ત બંદોબસ્ત ગોઠવવામાં આવ્યો હતો.
શિવરાત્રીની ઉજવણી નવી ઊંચાઈએ
સોમનાથમાં દર વર્ષે શિવરાત્રી ધામધૂમથી ઉજવાય છે, પરંતુ આ વર્ષે ત્રિવેણી સંગમની આ મહાઆરતીએ ઉજવણીને એક નવી ઊંચાઈ આપી છે. દેશ-વિદેશથી આવેલા શ્રદ્ધાળુઓ માટે આ દ્રશ્ય અવિસ્મરણીય રહ્યું હતું. ભક્તોએ પવિત્ર સ્નાન કરી મહાદેવના દર્શન કર્યા હતા અને મોડી રાત સુધી ચાલનારી પૂજા વિધિમાં સહભાગી થઈ આધ્યાત્મિક શાંતિ મેળવી હતી.