જૂનાગઢ: મહાશિવરાત્રીના પાવન પર્વ નિમિત્તે જૂનાગઢના ભવનાથ તળેટીમાં અત્યારે ભક્તિ, ભજન અને ભોજનનો ત્રિવેણી સંગમ રચાયો છે. લાખોની મેદની વચ્ચે સુરક્ષા વ્યવસ્થા જાળવવી એ એક મોટો પડકાર હોય છે, ત્યારે જૂનાગઢ પોલીસની 'SHE ટીમ' (SHE Team) મેળામાં આવતા શ્રદ્ધાળુઓ માટે સાચા અર્થમાં રક્ષક બનીને ઉભરી આવી છે. 'ગુજરાત ફર્સ્ટ' દ્વારા કરવામાં આવેલા ખાસ રિયાલિટી ચેકમાં આ મહિલા પોલીસ કર્મીઓની પ્રશંસનીય કામગીરી સામે આવી છે.
સાંકડા રસ્તાઓ પર સુરક્ષાનું 'ફૂટ પેટ્રોલિંગ'
ભવનાથ મેળામાં માનવ મહેરામણ એટલું મોટું હોય છે કે વાહનો દ્વારા દેખરેખ રાખવી મુશ્કેલ બને છે. આવા સમયે SHE ટીમની મહિલા પોલીસ અધિકારીઓ અને કર્મચારીઓ ધોમધખતા તાપમાં પણ સાંકડી ગલીઓ અને ભીડભાડ વાળા વિસ્તારોમાં સતત ફૂટ પેટ્રોલિંગ કરી રહી છે. મેળામાં આવતી દરેક માતા-બહેન નિર્ભય બનીને મહાદેવના દર્શન કરી શકે અને ઉત્સવ માણી શકે તે માટે આ ટીમ ૨૪ કલાક કાર્યરત છે.
ભૂલા પડેલા બાળકો અને વૃદ્ધો માટે સહારો
મેળાની ભીડમાં ઘણીવાર બાળકો પોતાના પરિવારથી છૂટા પડી જવાની ઘટનાઓ બનતી હોય છે. SHE ટીમના સભ્યો માત્ર કાયદો જાળવવાનું જ કામ નથી કરી રહ્યા, પરંતુ એક સામાજિક જવાબદારી પણ નિભાવી રહ્યા છે. ટીમ દ્વારા મેળામાં એકલા દેખાતા બાળકો અને વૃદ્ધોની આત્મીયતાપૂર્વક પૂછપરછ કરવામાં આવે છે. જો કોઈને મદદની જરૂર હોય તો તુરંત જ તેમને પોલીસ કંટ્રોલ રૂમ કે તેમના પરિવાર સુધી પહોંચાડવાની તજવીજ હાથ ધરવામાં આવે છે.
અસામાજિક તત્વો પર કડક નજર
મહિલાઓની સુરક્ષા સાથે છેડછાડ કરનારા કે મેળાના માહોલને બગાડનારા તત્વો સામે SHE ટીમે લાલ આંખ કરી છે. શંકાસ્પદ જણાતા શખ્સો અને ખાસ કરીને મહિલાઓની છેડતી કરનારા 'રોમિયો' પ્રકારના તત્વોનું આ ટીમ દ્વારા ચેકિંગ કરવામાં આવી રહ્યું છે. પોલીસની આ સતર્કતાને કારણે અસામાજિક તત્વોમાં ફફડાટ ફેલાયો છે અને યાત્રિકો સુરક્ષિત અનુભવી રહ્યા છે.
જનતા સાથે સીધો સંવાદ
શિવ મહોત્સવ દરમિયાન જોવા મળ્યું કે, SHE ટીમ માત્ર નિરીક્ષણ નથી કરતી પણ શ્રદ્ધાળુઓ સાથે સીધો સંવાદ પણ સાધે છે. મહિલા પોલીસ અધિકારીઓ યાત્રિકોને આશ્વાસન આપી રહ્યા છે કે, "કોઈપણ મુશ્કેલી જણાય તો સંકોચ વગર પોલીસનો સંપર્ક કરો." સ્થાનિકો અને પ્રવાસીઓએ આ કામગીરીને બિરદાવતા કહ્યું હતું કે, આવી વ્યવસ્થાને કારણે જ ભવનાથનો મેળો વધુ આનંદમય અને સુરક્ષિત બન્યો છે.