સુરેન્‍દ્રનગરઃ ઝાલાવાડના રાજકારણ અત્યારે ભારે  ગરમાયું  છે. સુરેન્દ્રનગરના ખાટડી ગામે ખેડૂત નેતા રાજુ કરપડા દ્વારા એક વિશાળ ખેડૂત સંવાદ કાર્યક્રમનું આયોજન કરવામાં આવ્યું હતું. આ કાર્યક્રમમાં મોટી સંખ્યામાં ખેડૂતોની હાજરીએ રાજુ કરપડાનું જબરદસ્ત શક્તિ પ્રદર્શન સાબિત કર્યું છે. આ સંમેલન દરમિયાન તેમણે ભાજપમાં જોડાવાના સ્પષ્ટ સંકેત આપ્યા છે, જોકે તેમણે સરકાર સામે કેટલીક માગણીઓનું પત્તું પણ ફેંક્યું છે.

રાજુ કરપડાએ ખેડૂતોના હિતમાં સરકાર સામે શરત મૂકી છે કે જો મૂળી, થાનગઢ અને ચોટીલા વિસ્તારના ખેડૂતોને સિંચાઈનું પાણી પૂરું પાડવામાં આવે, તો તેઓ સરકારની સાથે ભળી જવા તૈયાર છે. પરંતુ, અહીં નોંધવા જેવી બાબત એ છે કે જે યોજનાની તેઓ માગ કરી રહ્યા છે, તેના પર સરકાર પહેલેથી જ કામ કરી રહી છે.

મૂળી અને વઢવાણ સહિતના 44 ગામોમાં સિંચાઈનું પાણી પહોંચાડવા માટે સરકારે 1419 કરોડના ખર્ચે એક વર્ષ પહેલાં જ કામગીરી શરૂ કરી દીધી છે.

સૂત્રોના જણાવ્યા અનુસાર આ યોજના હવે અંતિમ તબક્કામાં છે. ત્યારે રાજુ કરપડાએ આ જ યોજનાને પોતાની માગણી તરીકે રજૂ કરતા રાજકીય વર્તુળોમાં ચર્ચા જાગી છે કે તેઓ ભાજપમાં જવા માટે સુરક્ષિત રસ્તો શોધી રહ્યા છે.

પોતાના સંબોધનમાં રાજુ કરપડાએ આક્રમક તેવર બતાવતા કહ્યું કે, "જો સરકાર મારી તમામ માગણીઓ સ્વીકારશે તો અમે સરકારની સાથે ભળી જઈશું. પરંતુ જો માગણીઓ નહીં સંતોષાય તો હું સરકાર સામે લડીશ. કોંગ્રેસ જો મને પ્લેટફોર્મ આપશે તો ત્યાં રહીને પણ હું ખેડૂતોના પ્રશ્નો ઉઠાવવાનું ચાલુ રાખીશ."

તેમણે વધુમાં જણાવ્યું કે ટૂંક સમયમાં જ સૌરાષ્ટ્રના તમામ ખેડૂત આગેવાનો સાથે મળીને એક મોટું સંમેલન યોજવાની તૈયારીઓ પણ શરૂ કરી દેવામાં આવી છે.

ખાટડી ખાતે યોજાયેલા આ કાર્યક્રમમાં આસપાસના ગામોમાંથી મોટી સંખ્યામાં ખેડૂતો ઉમટી પડ્યા હતા. રાજુ કરપડાએ ખેડૂતો સાથે સીધો સંવાદ સાધ્યો હતો અને તેમના પડતર પ્રશ્નો વિશે ચર્ચા કરી હતી.

રાજકીય વિશ્લેષકોનું માનવું છે કે જે રીતે રાજુ કરપડાએ સરકારની ચાલુ યોજનાને જ પોતાની શરત તરીકે મૂકી છે, તે જોતા લાગે છે કે તેમણે ભાજપમાં જવાનું મન બનાવી લીધું છે. હવે જોવાનું એ રહે છે કે સરકાર આ માગણીઓને કઈ રીતે સ્વીકારે છે અને આગામી દિવસોમાં સુરેન્દ્રનગરના રાજકારણમાં કયો નવો વળાંક આવે છે.