જૂનાગઢ: ગુજરાતમાં નશાબંધીના કડક અમલ વચ્ચે જૂનાગઢ પોલીસે એક મોટી સફળતા હાંસલ કરી છે. શહેરમાં કફ સીરપના નામે નશીલા પદાર્થોનું વેચાણ કરતી ટોળકીના એક સક્રિય સભ્યને પોલીસે દબોચી લીધો છે. ચોક્કસ બાતમીના આધારે પાડવામાં આવેલા દરોડામાં પોલીસે ૧૯૦ બોટલ નશીલી કફ સીરપ સાથે ઇબ્રાહિમ ઉર્ફે ટીટો મંધરા નામના શખ્સની ધરપકડ કરી છે. આ કાર્યવાહીથી જૂનાગઢના ડ્રગ માફિયાઓમાં ભારે ફફડાટ ફેલાઈ ગયો છે.

રહેણાંક વિસ્તારમાં નશાનું ડેપો!

પોલીસને માહિતી મળી હતી કે શહેરના એક ભરચક રહેણાંક વિસ્તારમાં દવાના બહાને નશાની સામગ્રી છુપાવવામાં આવી છે. દરોડા દરમિયાન આરોપી ઇબ્રાહિમ ઉર્ફે ટીટો રફીકભાઈ મંધરા પાસેથી 'RAXO.T.' નામની કફ સીરપનો મોટો જથ્થો મળી આવ્યો હતો. આ સીરપ કોઈપણ મેડિકલ પ્રિસ્ક્રિપ્શન વગર નશાના હેતુ માટે રાખવામાં આવી હતી. પોલીસે સ્થળ પરથી સીરપની બોટલો, મોબાઈલ ફોન અને આશરે ૪૪,૦૦૦ રૂપિયાની રોકડ રકમ સહિતનો મુદ્દામાલ કબજે કર્યો છે.

FSL અને ફૂડ એન્ડ ડ્રગ્સ વિભાગની એન્ટ્રી

જપ્ત કરવામાં આવેલી 'RAXO.T.' સીરપમાં નશીલા તત્વોનું પ્રમાણ કેટલું છે અને તે સ્વાસ્થ્ય માટે કેટલી જોખમી છે, તેની તપાસ માટે પોલીસે ફૂડ એન્ડ ડ્રગ્સ વિભાગની મદદ લીધી છે. સીરપના નમૂનાઓને પરીક્ષણ માટે પ્રયોગશાળામાં મોકલવામાં આવ્યા છે. જો તેમાં પ્રતિબંધિત કે નશીલા પદાર્થોની હાજરી સાબિત થશે, તો આરોપીઓ સામે NDPS એક્ટ હેઠળ કડકમાં કડક ગુનો નોંધીને કાર્યવાહી કરવામાં આવશે.

રિમાન્ડમાં ખૂલશે મોટા માથાઓના નામ?

પોલીસ હવે એ દિશામાં તપાસ કરી રહી છે કે નશાનો આ આટલો મોટો જથ્થો જૂનાગઢમાં ક્યાંથી સપ્લાય કરવામાં આવતો હતો? આ કાળા કારોબાર પાછળ કયું મોટું માથું કામ કરી રહ્યું છે? આરોપી ટીટોને રિમાન્ડ માટે કોર્ટમાં રજૂ કરવામાં આવશે. પોલીસને શંકા છે કે આ માત્ર હિમશીલાની ટોચ છે અને રિમાન્ડ દરમિયાન જૂનાગઢમાં ફેલાયેલા નશાના મોટા નેટવર્કનો પર્દાફાશ થઈ શકે છે.