(મુકુંદભાઇ બદિયાણી દ્વારા) જામનગર: જામનગર શહેરના બેડેશ્વર વિસ્તારમાં આવેલી કાપડ મિલની ચાલી પાસે એક અજાણ્યા આધેડનો મૃતદેહ મળી આવતા આ વિસ્તારમાં ભારે અરેરાટી ફેલાઈ ગઈ હતી. આ બાબતે સ્થાનિક યુવાન રવિભાઈ કિશોરભાઈ પરમાર દ્વારા સિટી બી-ડિવિઝન પોલીસ મથકમાં જાણ કરવામાં આવી હતી. પ્રાથમિક તપાસમાં મૃતક પુરુષની ઉંમર આશરે 50 થી 60 વર્ષની જણાય છે. મૃતદેહ લાંબા સમયથી પડ્યો હોવાનું માલૂમ પડે છે, કારણ કે લાશ સંપૂર્ણપણે કોહવાઈ ગઈ હોવાથી તેના શરીર પર કોઈ વિશિષ્ટ નિશાનો કે ઓળખ ચિહ્નો સ્પષ્ટ દેખાતા નથી.

ઘટનાની ગંભીરતાને ધ્યાનમાં રાખીને સિટી બી-ડિવિઝન પોલીસે તાત્કાલિક ધોરણે અકસ્માતે મોતનો ગુનો (બીએનએસએસ કલમ-194 હેઠળ) નોંધીને તપાસ હાથ ધરી છે. પોલીસે મૃતકની ઓળખ માટે આસપાસના વિસ્તારોમાં તપાસ શરૂ કરી છે, પરંતુ હાલમાં મૃતકનો કોઈ વાલી-વારસદાર મળી આવ્યો નથી. મૃતકે પેન્ટ અને શર્ટ પહેરેલું હોવાનું જાણવા મળ્યું છે, પરંતુ કોહવાઈ ગયેલા મૃતદેહને કારણે તેની ઓળખ કરવી પોલીસ માટે એક મોટો પડકાર બની રહી છે. પોલીસ દ્વારા ફોરેન્સિક અને અન્ય જરૂરી તબીબી પ્રક્રિયાઓ પણ હાથ ધરવામાં આવી રહી છે.

પોલીસે શહેરના નાગરિકોને અપીલ કરી છે કે જો કોઈ વ્યક્તિ પોતાના કોઈ સ્વજન ગુમ થયા હોય અથવા તો આ મૃતકની ઓળખ અંગે કોઈ પણ પ્રકારની માહિતી ધરાવતા હોય, તો તાત્કાલિક જામનગર સિટી બી-ડિવિઝન પોલીસ સ્ટેશનનો સંપર્ક કરવો. માહિતી આપનાર વ્યક્તિ જામનગર સિટી બી-ડિવિઝન પોલીસ સ્ટેશનના ફોન નંબર 63696-29353 અથવા તપાસનીશ અધિકારી પો. સબ ઇન્સ. ડી.જી.રાજ (મો.નં. 96247-37601) પર સંપર્ક કરી શકે છે. પોલીસ હાલ આ મામલે વાલી-વારસદારોની શોધખોળ માટે તમામ શક્ય પ્રયાસો કરી રહી છે જેથી મૃતકની અંતિમવિધિ યોગ્ય રીતે કરી શકાય.