સાવરકુંડલા:સાવરકુંડલા શહેરના લાખો નાગરિકોને વર્ષોથી પાણીની પડતી હાલાકીમાંથી કાયમી મુક્તિ અપાવવા માટે રાજ્ય સરકાર દ્વારા એક મહત્વપૂર્ણ પગલું ભરવામાં આવ્યું છે. અમૃત-2.0 યોજનાના અંતર્ગત શહેરમાં પીવાના પાણીની વ્યવસ્થાને વધુ સુદૃઢ બનાવવાના ઉદ્દેશ્યથી શેલ દેદુમલ ડેમ નજીક રૂ. 55 લાખના ખર્ચે નવનિર્મિત ઓપનવેલ (ખુલ્લા કૂવા) પ્રોજેક્ટનું ખાતમુહૂર્ત સ્થાનિક ધારાસભ્ય મહેશભાઈ કસવાલાના વરદ હસ્તે કરવામાં આવ્યું હતું. આ પ્રોજેક્ટ શહેરની પાણી પુરવઠા વ્યવસ્થા માટે એક સીમાચિહ્નરૂપ સાબિત થશે, જેનાથી આગામી દિવસોમાં નાગરિકોને શુદ્ધ અને પૂરતું પાણી ઘરઆંગણે ઉપલબ્ધ થઈ શકશે.

આ કાર્યક્રમ દરમિયાન ધારાસભ્ય મહેશભાઈ કસવાલાએ જણાવ્યું હતું કે, ગુજરાત સરકાર રાજ્યના દરેક શહેર અને ગામડામાં પીવાનું પાણી, પાકા રસ્તા, આરોગ્ય અને શિક્ષણ જેવી પાયાની સુવિધાઓ આપવા માટે સતત પ્રયત્નશીલ છે. સાવરકુંડલાના નાગરિકોને પીવાના પાણી માટે ક્યાંય વલખા ન મારવા પડે તે માટે સરકાર પ્રતિબદ્ધ છે. અમૃત-2.0 યોજના હેઠળ હાથ ધરાયેલું આ ઓપનવેલનું કામ શહેરની જળ સુરક્ષામાં એક મજબૂત કડી બની રહેશે. આ પ્રોજેક્ટ પૂર્ણ થવાથી પાણીની અછતની સમસ્યાનું નિર્મૂલન થશે અને શહેરની સુવિધામાં મોટો વધારો થશે.

ખાતમુહૂર્ત પ્રસંગે નગરપાલિકાના હોદ્દેદારો, શહેર ભાજપના પદાધિકારીઓ અને સ્થાનિક રહીશો મોટી સંખ્યામાં હાજર રહ્યા હતા. પ્રોજેક્ટને નિર્ધારિત સમયમર્યાદામાં પૂર્ણ કરી લોકાર્પણ કરવાની ખાતરી પણ આપવામાં આવી છે. સાવરકુંડલા શહેર માટે પાણીની સમસ્યાનો આ કાયમી ઉકેલ નાગરિકો માટે ખૂબ મોટી રાહત સમાન છે. માળખાગત વિકાસની દિશામાં આગળ વધી રહેલા આ શહેર માટે જળ ક્ષેત્રે થયેલું આ રોકાણ આવનારા સમયમાં વિકાસને વધુ વેગ આપશે, જેનાથી સામાન્ય નાગરિકોના જીવનધોરણમાં નોંધપાત્ર સુધારો જોવા મળશે તેવી અપેક્ષા વ્યક્ત કરવામાં આવી છે.