મોરબી:વૈશ્વિક સ્તરે ચાલી રહેલા સંઘર્ષો અને સમુદ્રી ભાડામાં થયેલા અભૂતપૂર્વ વધારાને કારણે મોરબીનો પેપર ઉદ્યોગ અત્યારે ગંભીર આર્થિક સંકટના વંટોળમાં ફસાયો છે. આ કપરી પરિસ્થિતિમાં ઉદ્યોગને બેઠો કરવા માટે મોરબી પેપર મિલ્સ એસોસિએશન અને ગુજરાત મિનરલ ડેવલપમેન્ટ કોર્પોરેશન (GMDC)ના ઉચ્ચ અધિકારીઓ વચ્ચે એક મહત્વપૂર્ણ બેઠક યોજાઈ હતી. GMDCના ડેપ્યુટી જનરલ મેનેજર નીરજ પરીક અને ડી.કે. જૈનની હાજરીમાં મળેલી આ બેઠકમાં એસોસિએશનના પ્રમુખ શૈલેશ દેત્રોજા અને અન્ય હોદ્દેદારોએ પેપર મિલોની વર્તમાન કફોડી હાલતનું ચિત્ર રજૂ કર્યું હતું. ભારતીય પેપર ઉદ્યોગ મુખ્યત્વે આયાતી વેસ્ટ પેપર પર નિર્ભર હોવાથી વૈશ્વિક સપ્લાય ચેઈનમાં આવતા વિક્ષેપો સીધી રીતે મોરબીના કારખાનાઓને બંધ થવા તરફ ધકેલી રહ્યા છે.

બેઠક દરમિયાન મોરબી પેપર મિલ્સ એસોસિએશને ખૂબ જ આક્રમક વલણ અપનાવતા સરકાર પાસે કેટલીક નક્કર માંગણીઓ મૂકી હતી. ખાસ કરીને લિગ્નાઈટના ભાવમાં થતા વારંવારના વધારાને અટકાવીને તેને સ્થિર રાખવા માટે ઉદ્યોગપતિઓએ દબાણ કર્યું છે. એટલું જ નહીં, નિયમિત ખરીદદારોને પ્રાથમિકતાના ધોરણે લિગ્નાઈટનું એલોકેશન ચાલુ રાખવા અને તેની ગુણવત્તામાં કોઈ પણ પ્રકારની બાંધછોડ ન કરવા અંગે પણ સ્પષ્ટ સૂચનાઓ આપવામાં આવી હતી. પેપર ઉદ્યોગકારોનું માનવું છે કે જો અત્યારે યોગ્ય ઊર્જા પુરવઠો અને સસ્તું લિગ્નાઈટ નહીં મળે, તો મોરબીમાં હજારો શ્રમિકોની રોજગારી જોખમમાં મુકાઈ જશે અને અનેક એકમો કાયમી ધોરણે તાળાબંધી તરફ ધકેલાઈ જશે.

ઉદ્યોગના અસ્તિત્વ માટે સહકાર અને સંકલનનો સૂર બેઠકમાં ગુંજ્યો હતો. GMDC અને પેપર ઉદ્યોગ બંને એક જ ઔદ્યોગિક ચેઈનના મહત્વના હિસ્સા હોવાનું સ્વીકારીને બંને પક્ષોએ પરસ્પર સહયોગથી આ આર્થિક તોફાનને પાર પાડવા સહમતી દર્શાવી હતી. જોકે, માત્ર આશ્વાસનોથી કામ નહીં ચાલે તેવી સ્પષ્ટતા એસોસિએશનના સભ્યોએ કરી છે. હવે જોવાનું એ રહેશે કે GMDC આ રજૂઆતો બાદ લિગ્નાઈટના ભાવમાં કેટલી રાહત આપે છે અને મોરબીના આ મહત્વપૂર્ણ ઉત્પાદન ક્ષેત્રને બચાવવા માટે સરકાર કેટલાં નક્કર પગલાં લે છે. મોરબીના પેપર ઉદ્યોગ માટે આવનારા દિવસો અત્યંત નિર્ણાયક સાબિત થવાના છે.