(મુકુંદ બદિયાણી દ્વારા)જામનગર તા ૧૪ : જામનગર જિલ્લામાં વર્ષ ૨૦૨૨માં  એક સગીરા સાથે દુષ્કૃત્ય અંગેના કેસમાં અદાલતે આરોપીને ૧૦ વર્ષની જેલ સજા અને રૂ.૧૭ હજારના દંડનો હુકમ કર્યો છે.

આ કેસની વિગતો મુજબ વર્ષ ૨૦૨૨માં ઉત્તર ગુજરાતના જિલ્લાના એક ગામનો ખેત મજુર પરિવાર લાલપુર તાલુકાના એક ગામે મજુરી કામ કરવા આવ્યો હતો. આ દરમિયાન ખેત મજુર દંપતી વતનમાં ગયા હતા, ત્યારે પાછળથી ૩ વર્ષ અને ૧ માસની પુત્રીને કનુ કજભાઈ બારીયા નામના શખસે લાલચ આપીને બદકામ કરવાના ઈરાદે અપહરણ કરી ગયાની ફરિયાદ લાલપુર પોલીસમાં નોંધાઈ હતી. 

તેથી શોધખોળના અંતે પોલીસે આરોપીની ધરપકડ કરી હતી, તેમજ આ પ્રોટેક્શન ઓફ ચિલ્ડ્રન અગેઈન્સ્ટ સેક્સ્યુઅલ ઓફેન્સ (પોક્સો) કાયદાની ખાસ અદાલતમાં ચાર્જશીટ દાખલ કરી હતી. 

આ કેસ ચાલી જતાં પોક્સો અદાલતે પુરાવા, સરકારી વકીલ મુકેશભાઈ જાનીની રજુઆતો વગેરે ને ગ્રાહ્ય ગણીને બંને પક્ષોને સાંભળીને આરોપીને તકસીરવાન ઠેરવી અપહરણના ગુનામાં ૭ વર્ષની, અને દુષ્કર્મના કેસમાં ૧૦ વર્ષની જેલ સજા અને રૂ.૧૭ હજારનો દંડ કરતો હુકમ ફરમાવ્યો હતો.