(વિનોદ ગાલા દ્વારા)ભુજ તા.૧૯ : રાજ્ય મરીન ટાસ્ક ફોર્સની દરિયાકિનારા વિસ્તારમાં સાવધાન રહેવાની સૂચનાના અનુસંધાને જખૌ સેક્ટરની મરીન ટાસ્ક ફોર્સ દ્વારા ડીવાયએસપી આર.એમ. ચૌધરીના નેતૃત્વમાં એક વિશેષ અભિયાન હાથ ધરવામાં આવ્યું હતું. આ અભિયાનમાં જખૌ બંદર, જખૌ જેટી, ભારત સોલ્ટ અને શિયાળ બારી સુધીના દરિયાઈ તટીય વિસ્તારમાં સઘન ચેકિંગ કરવામાં આવ્યું હતું. 

ડ્રાઈવ દરમિયાન માછીમારો સાથે શંકાસ્પદ વ્યક્તિઓ, શંકાસ્પદ બોટો અને ડ્રગ્સ જેવા કેફી પદાર્થોની હેરાફેરી જેવા ગંભીર વિષયો પર ચર્ચા કરવામાં આવી હતી. તેમને આવી કોઈ પણ ગતિવિધિ જણાય તો તાત્કાલિક જાણ કરવા અને જરૂરી મદદ કરવા સૂચનાઓ આપવામાં આવી હતી.

વધુમાં, હાલમાં ચાલી રહેલા યુદ્ધને કારણે દરિયામાં તૂટી પડેલા જહાજો, બોટો અને મિસાઈલો જેવા યુદ્ધમાં વપરાયેલા સાધનો દરિયાઈ પ્રવાહ મારફતે કિનારા સુધી તણાઈ આવવાની શક્યતા છે. આ અંગે પણ સ્થાનિક લોકોને જાગૃત કરવામાં આવ્યા હતા.