જામનગરના ગ્રામ્ય પંથકમાંથી ગયા સોમવારે થી.૧૨ની પરીક્ષા આપવા ખાવેલી એક વિદ્યાર્થિનીને કાળા કાચવાળી મોટરમાં બેસાડી લઇ અવાવર સ્થળે લઈ જઈ દુષ્કર્મ ગુજારનાર શખ્સને પોલીસે દબોચી લીધો છે. પ્રેમલગ્ન પછી સંતાન તથા પત્નીને છોડી એક મહિલા પોલીસકર્મી સાથે લિવ ઇન રિલેશનશીપમાં પોલીસ હેડકવાર્ટરમાં રહેતા આ શખ્સ સામે ફીટકાર વરસ્યો છે.

  જામનગરના ગ્રામ્ય પંથકમાં વસવાટ કરતા એક પરિવારની ધો.૧૨માં અભ્યાસ કરતી પુત્રી ચાલુ મહિનામાં શરૂ થયેલી બોર્ડની પરીક્ષા આપવા માટે જામનગર આવતી રહેતી હતી. તે દરમિયાન ગઈ તા.૧૨ના દિવસે જામનગર પરીક્ષા આપવા આવી ત્યારે તેની સાથે જામનગરમાં મોટરની લે-વેચનો વ્યવસાય કરતો ભરત ગોવિંદભાઈ બામરોટીયા નામનો શખ્સ પરિચયમાં આવ્યો હતો. આ વેળાએ ભરતે તે વિદ્યાર્થિનીના મોબાઈલ નંબર મેળવ્યા હતા.
  ત્યારપછી આ વિદ્યાર્થિનીને ભરતે મોબાઈલમાં મેસેજ કર્યો હતો. તે પછી ગયા સોમવારે તેણી જ્યારે પરીક્ષાનું પેપર આપવા જામનગર આવી અને નવા એસટી ડેપો પર ઉતરી ત્યારે ભરત બામરોટીયા મોટર લઈને આવ્યો હતો. જ્યાંથી તેણે આ વિધાર્થિનીને પરીક્ષા સ્થળે મૂકી જવાનું કહીને બેસાડ્યા પછી સાતરસ્તા પાસેથી નવા બનાવવામાં આવેલા ઓવરબ્રિજ નીચે એક અવાવર- સ્થસ્થળે થઈ જઈ ત્યાં મોટર પાર્ક કર્યા પછી કાળા કાચ ચઢાવી દઈ વિદ્યાર્થિની પર દુષ્કર્મ ગુજાયું હતું.
   આ વેળાએ વિદ્યાર્થિનીએ પ્રતિકાર કરતા ભરતે તેણીને ગળા પર ઈજા પહોંચાડી હતી. ત્યારપછી પરીક્ષા કેન્દ્રએ પહોંચી વિદ્યાર્થિનીએ પેપર લખ્યું હતું અને ત્યાંથી સાંજે જયારે ઘરે પહોંચી ત્યારે પરિવારજનોએ ગળા પર શું થયું તેમ પૂછતા આ વિધાર્થિનીએ ભરત બામરોટીયાએ ગુજારેલા દુષ્કર્મની વાત કરતા હેબતાઈ ગયેલા પરિવારે પોલીસમાં ફરિયાદ કરવાનો નિર્ણય કરી જામનગર દોડી આવી સિટી બી ડિવિઝનમાં ફરિયાદ નોંધાવી હતી. પોલીસે ગુન્હો નોંધી શરૂ કરેલી તપાસમાં ભરત બામરોટીયા ઝડપાઈ ગયો છે. આ શખ્સને હાલમાં જેલહવાલે કરવામાં આવ્યો છે.
  વધુમાં જાણવા મળ્યા મુજબ ભરત બામરોટીયાએ અગાઉ એક યુવતી સાથે પ્રેમલગ્ન કર્યા હતા. તે પછી સંતાનની પ્રાપ્તિ થઈ હતી અને બંને વચ્ચે વિખવાદ થતાં તેમજ ભરત બામરોટીયા એક મહિલા પોલીસ કર્મચારીના સંપર્કમાં આવતા બંનેએ લિવ ઈન રિલેશનશીપમાં સાથે રહેવાનું શરૂ કર્યું હતું. તેથી હાલમાં ભરત બામરોટીયા પોલીસ હેડકવાર્ટરમાં રહેતો હોવાનું બહાર આવ્યું છે.