(પ્રવિણ વ્‍યાસ દ્વારા) મોરબી,તા.૦૬: અહીંથી ૬૫ કિલોમીટર દૂર આવેલા  મોરબીના સામાકાંઠે આવેલા રાજવી પરિવારના ઐતિહાસિક નવા મહેલ (ન્‍યૂ પેલેસ) માં કાલે અચાનક જ વિકરાળ આગ ફાટી નીકળતા અફરાતફરી મચી જવા પામી હતી. આગમાં મહેલમાં રહેલી ઘણી અમૂલ્‍ય ઐતિહાસિક ચીજવસ્‍તુઓ બળીને રાખ થઈ ગઈ છે. જોકે, અગ્નિશમન વિભાગની સતર્કતાથી એક મહિલાને સહીસલામત ઉગારી લેવામાં આવતા મોટી જાનહાનિ ટળી હતી. મહાનગરપાલિકાના નાયબ કમિશનર સહિતના ઉચ્‍ચ અધિકારીઓ ઘટનાસ્‍થળે દોડી ગયા હતા.

વિગતે જોઈએ તો મોરબી શહેરની ઐતિહાસિક ધરોહર અને રાજવી પરિવારના નિવાસસ્‍થાન સમાન સામાકાંઠે આવેલા નવા મહેલમાં આજે (૫ એપ્રિલ ૨૦૨૬) અચાનક જ આગ ભભૂકી ઊઠતા સમગ્ર પંથકમાં ચિતાનું મોજું ફરી વળ્‍યું હતું. ડિજિટલ મીડિયા અને સત્તાવાર સૂત્રો પાસેથી મળતી વિસ્‍તૃત વિગતો અનુસાર, મહેલની અંદર આગ એટલી વિકરાળ હતી કે જોતજોતામાં તેણે રાજવી પરિવારના અનેક ઐતિહાસિક વારસા અને અમૂલ્‍ય ચીજવસ્‍તુઓને પોતાની લપેટમાં લઈ લીધા હતા.

આ દુર્ઘટનામાં મહેલના ૨ થી ૩ ઓરડાઓને ભારે નુકસાન પહોંચ્‍યું છે અને સદીઓ જૂની ધરોહર રાખમાં ફેરવાઈ ગઈ છે.

આગના બનાવ સમયે મહેલની અંદર કામ કરતી એક મહિલા ધુમાડા અને જ્‍વાળાઓ વચ્‍ચે ત્રીજા માળે ફસાઈ ગઈ હતી. ઘટનાની જાણ થતાં જ મોરબી અગ્નિશમન વિભાગની ટીમ તાત્‍કાલિક ૩ જેટલા લાઈબંબા (અગ્નિશામક વાહનો) સાથે ઘટનાસ્‍થળે પહોંચી ગઈ હતી. અગ્નિશમન વિભાગના જવાનોએ જીવના જોખમે સતત પાણીનો મારો ચલાવીને ફસાયેલી મહિલાને સફળતાપૂર્વક અને દિલધડક રીતે બચાવી લીધી હતી.

સમયસરની આ કામગીરીને કારણે એક મોટી જાનહાનિ થતા સહેજમાં અટકી હતી.

આ ઘટનાની ગંભીરતાનો અંદાજ એ વાત પરથી લગાવી શકાય છે કે, મોરબીના મુખ્‍ય અગ્નિશમન અધિકારી અકસ્‍માતને કારણે પથારીવશ હોવા છતાં, ફરજ પર હાજર થઈને જાતે પાણીના મોટા ટેન્‍કર સાથે ઘટનાસ્‍થળે દોડી ગયા હતા.

મોરબી મહાનગરપાલિકાના નાયબ કમિશનર શ્રી  કુલદીપસિહ વાળા પણ તાત્‍કાલિક અસરથી સ્‍થળ પર પહોંચી ગયા હતા અને રાહત તથા બચાવ કામગીરીનું જાતે નિરીક્ષણ કર્યું હતું.

હાલમાં અગ્નિશમન વિભાગ દ્વારા આગ પર સંપૂર્ણપણે કાબૂ મેળવી લેવામાં આવ્‍યો છે અને તાપમાન નીચું લાવવાની પ્રક્રિયા હાથ ધરવામાં આવી છે. આગ કયા કારણોસર લાગી તેનું ચોક્કસ કારણ હજુ સુધી જાણી શકાયું નથી.

આગ સંપૂર્ણપણે બુઝાઈ ગયા બાદ અને સ્‍થળ સુરક્ષિત થયા પછી જ નુકસાનીનો સત્તાવાર અંદાજ અને ઔપચારિક નિવેદન બહાર પાડવામાં આવશે તેમ તંત્ર દ્વારા જણાવાયું છે.

અમૂલ્‍ય વારસાને થયેલા આ નુકસાનથી મોરબીવાસીઓમાં ભારે આઘાત અને દુઃખની લાગણી ફેલાઈ ગઈ છે.