(યાસીન બ્‍લોચ દ્વારા) વિસાવદર, તા.૯: ‘સાથી હાથ બઢાના'ના નારા  સાથે વિસાવદરમાં મિશન બ્રોડગેજ સહી ઝુંબેશ કાર્યક્રમનું  વિસાવદરમાં આગામી તા. ૧૦/૦૬/૨૦૨૬ બુધવાર સમયઃ સવારે ૧૦ થી ૧ દરમિયાન જુના બસ સ્‍ટેશન ચોક , સતાધાર રોડ, વિસાવદર ખાતે આયોજન કરાયું છે.

આયોજકોએ જાહેર અપીલ કરતા જણાવ્‍યું છે કે ‘આથી આદરણીય વડીલો, વ્‍હાલા દોસ્‍તો, સામાજીક સંસ્‍થાઓના આગેવાનો, ચુંટાયેલા પ્રતિનિધિઓ, રાજકીય આગેવાનો સૌને જાણ કરવામાં આવે છે કે, ધારી પત્રકાર સંઘ તેમજ અમરેલી બ્રોડગેજ કમેટી અને જાગળત નાગરિકો દ્વારા મિશન બ્રોડગેજ સુવિધા અંતર્ગત વિસાવદર ખાતે સહી ઝુંબેશ રાખવામાં આવેલ છે.

આ બિન રાજકીય મિશનની માંગ છે કે, અમરેલીથી વિસાવદર સુધી ચાલી રહેલ મીટર ગેજને બ્રોડગેજમાં રૂપાંતરિત કરવામાં આવે..ચલાલા-ધારી અને વિસાવદર પંથકના હજારો લોકો સુરત અમદાવાદ વડોદરા મુંબઈ જેવા શહેરોમાં સ્‍થાયી થયેલા છે.. જેઓ પોતાના માદરે વતન વહેવાર અને વેપાર અર્થે અવરજવર પણ કરે છે અને સાથોસાથ આધુનિક અદ્યતન સુવિધાઓને બદલે મીટર ગેજ ટ્રેન સુવિધાના કારણે મોટા શહેરો સુધી પહોંચવામાં મુશ્‍કેલીનો સામનો કરવો પડી રહ્યો છે અને સાથોસાથ ધારી ચલાલા પ્રજાકીય વ્‍યાજબી માંગણી પ્રમાણે બ્રોડગેજ સુવિધા મળે તો આ સમગ્ર વિસ્‍તારનો વિકાસ પણ થઈ શકે તેમ છે. આ વ્‍યાજબી માંગ સાથે રાખવામાં આવેલ સહી ઝુંબેશમાં સૌ મોટી સંખ્‍યામાં હાજરી આપે અને દરેક વ્‍યક્‍તિ સાથે પાંચ વ્‍યક્‍તિઓને લેતા આવે તે જરૂરી છે. બ્રોડગેજ સુવિધા એ પ્રજાનો હક્ક છે. આ હક્ક અપાવવા માટે ધારી પત્રકાર સંઘે એક મિશન શરૂ કરેલ છે. જેને જાગળત નાગરિકો તેમજ અમરેલી બ્રોડગેજ કમીટીએ સંપુર્ણ ટેકો આપેલ છે. વિસાવદરની જનતા  બુધવારે સહી ઝુંબેશનાં કાર્યમાં વધુમાં વધુ સંખ્‍યામાં જોડાઈ તેવી આયોજકોએ જાહેર અપીલ કરી છે.