(ફઝલ ચોૈહાણ દ્વારા) વઢવાણ,તા. ૧૨:ચોટીલા પોલીસ સ્‍ટેશનના પી.આઈ., પી.એસ.આઈ. અને અન્‍ય બે પોલીસકર્મીઓ સહિત કુલ ચાર પોલીસકર્મીઓને ફરજમાં બેદરકારી અને ગંભીર આક્ષેપોના પગલે સસ્‍પેન્‍ડ કરવામાં આવ્‍યા છે. ઉચ્‍ચ અધિકારીઓ દ્વારા લેવાયેલા આ કડક પગલાથી પોલીસ વિભાગમાં ચકચાર મચી ગઈ છે.

 બે દિવસ પહેલા મોલડી હાઈવે પર આવેલી એક હોટલ પર વિઝિલન્‍સ ટીમે આકસ્‍મિક દરોડા પાડ્‍યા હતા. આ દરોડા દરમિયાન હોટલમાંથી કેમિકલનો જથ્‍થો મળી આવ્‍યો હતો. આ સમગ્ર મામલામાં ચોટીલા પોલીસની ભૂમિકા શંકાસ્‍પદ જણાતા અને ફરજમાં બેદરકારી દાખવવા બદલ આ કાર્યવાહી કરવામાં આવી છે.

આ ઘટનાને પગલે સ્‍થાનિક પોલીસ દ્વારા હોટલમાંથી કેમિકલનો જથ્‍થો ઝડપાયો હોવા છતાં પૂરતી કાર્યવાહી ન કરવામાં આવી હોવાના આક્ષેપો સામે આવ્‍યા હતા. આ ગંભીર બેદરકારીને ધ્‍યાનમાં રાખીને ઉચ્‍ચ અધિકારીઓએ તાત્‍કાલિક સસ્‍પેન્‍શનના આદેશ જારી કર્યા છે.

હાલમાં આ અંગે પોલીસ વિભાગના ઉચ્‍ચ અધિકારીઓ દ્વારા વધુ તપાસ હાથ ધરવામાં આવી રહી છે. જવાબદાર પોલીસ અધિકારીઓ અને કર્મીઓ સામે લેવાયેલા આ પગલાથી પોલીસ તંત્રમાં ભ્રષ્ટાચાર અને બેદરકારી સામે કડક વલણ અપનાવવામાં આવ્‍યું હોવાનો સ્‍પષ્ટ સંદેશ પહોંચાડવામાં આવ્‍યો છે.