ભુજ:કચ્છ ચેમ્બર્સ ઓફ કોમર્સ એન્ડ ઇન્ડસ્ટ્રીઝના પ્રમુખ રાજેશભાઇ ભટ્ટ(ઉ.વ.૬૪)નું આજે સવારે દુઃખદ નિધન થયું છે. ભૂકંપ બાદ કચ્છમાં ઉદ્યોગ અને વ્યાપાર જગત તેમ જ પ્રવાસન ક્ષેત્રે વિકાસ માટે તેઓ સતત સક્રિય હતા. કચ્છને સ્પર્શતા પ્રશ્નો તેમ જ ભુજ શહેરના વિકાસ માટે તેઓ હકારાત્મક અભિગમ સાથે વહીવટીતંત્ર તેમ જ સરકાર સાથે રહી ઉકેલવા પ્રયાસો કરતા. સ્વામિનારાયણ સંપ્રદાયના ચુસ્ત સત્સંગી રાજેશભાઈ હસમુખા મિલનસાર વ્યક્તિત્વના ધણી હતા. તેમના નિધનથી કચ્છ એ જાહેર ક્ષેત્રના આગેવાનને ગુમાવ્યા છે. તેમને ઉદ્યોગ, વ્યાપાર, સામાજિક, રાજકીય આગેવાનો એ ભાવભરી શ્રદ્ધાંજલિ અર્પણ કરી છે.