ગોંડલ : રાજકોટ જિલ્લાના ગોંડલ શહેરમાંથી સાયબર ક્રાઈમનો એક અત્યંત ચોંકાવનારો અને હૃદયદ્રાવક કિસ્સો સામે આવ્યો છે. દિવસેને દિવસે વધી રહેલા ઓનલાઈન ફ્રોડનો ભોગ બનીને એક નિર્દોષ ગૃહિણીએ પોતાનો જીવ ગુમાવ્યો છે. ગોંડલના ગુંદાળા રોડ પર આવેલા શાંતિનગર વિસ્તારમાં રહેતા ૪૦ વર્ષીય ગૃહિણી નિમિષાબેન ઘેટીયાએ પોતાના ઘરે પંખા સાથે ચુંદડી બાંધી ગળાફાંસો ખાઈ આત્મહત્યા કરી લેતાં સમગ્ર વિસ્તારમાં ભારે અરેરાટી અને શોકનું મોજું ફરી વળ્યું છે.

પ્રાપ્ત વિગતો અનુસાર, મૃતક નિમિષાબેન છેલ્લા કેટલાક દિવસોથી અગમ્ય કારણોસર ભારે માનસિક તણાવમાં હતા. પરિણીતાના આકસ્મિક પગલા બાદ પરિવારજનોની પૂછપરછ અને તપાસ દરમિયાન સામે આવ્યું છે કે, મૃતકે આશરે ૧૦ દિવસ પહેલાં પોતાના સોનાના દાગીના બેંક અથવા ફાયનાન્સ કંપનીમાં ગીરવે મૂકી લોન લીધી હતી. આ લોન મેળવ્યા બાદ તેમણે તબક્કાવાર આશરે ₹૨,૦૦,૦૦૦ જેટલી મોટી રકમ કોઈ અજાણ્યા વ્યક્તિના બેંક એકાઉન્ટમાં ઓનલાઈન ટ્રાન્સફર કરી હતી.

પરિવારજનોના જણાવ્યા અનુસાર, અચાનક દાગીના ગીરવે મૂકીને અજાણ્યા સ્કેમર્સને રકમ મોકલવા પાછળ કોઈ ગંભીર સાયબર કૌભાંડ હોઈ શકે છે. હાલમાં સીબીઆઈ, પોલીસ કે ઈડીના નામે 'ડિજિટલ એરેસ્ટ' કરીને લોકોને બ્લેકમેલ કરવાના અનેક કિસ્સાઓ પ્રકાશમાં આવી રહ્યા છે. આશંકા સેવવામાં આવી રહી છે કે નિમિષાબેન પણ આવા જ કોઈ ઓનલાઈન સાયબર ઠગાઈના ભય અને લોકલાજના ડરથી ફસાઈ ગયા હતા, જેના કારણે તેમણે આ આત્યંતિક પગલું ભર્યું.

ઘટનાની જાણ થતાં જ ગોંડલ સિટી B-ડિવિઝન પોલીસનો કાફલો ઘટનાસ્થળે દોડી આવ્યો હતો. પોલીસે મૃતદેહનો કબજો મેળવી આત્મહત્યાનું ચોક્કસ કારણ જાણવા માટે મૃતદેહને ફોરેન્સિક પોસ્ટમોર્ટમ અર્થે રાજકોટ ખસેડ્યો છે. સાથોસાથ મૃતકનો મોબાઈલ ફોન કબજે કરીને કોલ ડિટેલ્સ (CDR), બેંક ટ્રાન્ઝેક્શન અને UPI ID ની ટેકનિકલ તપાસ હાથ ધરી છે. સાયબર સેલની મદદથી આ કૌભાંડ આચરનારા ઠગબાજો સુધી પહોંચવા પોલીસે ચક્રો ગતિમાન કર્યા છે.