અમરેલી : જિલ્લામાં કુદરતી સંપત્તિ અને નદીઓના પટમાંથી ગેરકાયદે ખનીજ ચોરી કરતી પ્રવૃત્તિઓ પર લગામ કસવા માટે ખાણ અને ખનીજ વિભાગ સતત સક્રિય બન્યું છે. તાજેતરમાં અમરેલીના મેડી અને નાના માંડવાળા ગામ પાસેથી પસાર થતી પવિત્ર શેત્રુજી નદીના કાંઠે ચાલી રહેલી મોટા પાયાની બેફામ રેતી ચોરી પર ખાણ-ખનીજ વિભાગની ટીમે અચાનક રેડ કરી હતી. નદીના પટમાંથી ગેરકાયદેસર રીતે કિંમતી રેતી ઉલેચાઈ રહી હોવાની ચોક્કસ બાતમીના આધારે અધિકારીઓનો કાફલો ઘટના સ્થળે ત્રાટક્યો હતો.

રેડ દરમિયાન નજરે પડેલા દ્રશ્યો ચોંકાવનારા હતા. શેત્રુજી નદીના કાંઠેથી ભારેખમ લોડર, ટ્રેક્ટર અને ડમ્પર જેવા વાહનોનો ઉપયોગ કરીને મોટા પાયે રેતીનું ખનન કરવામાં આવી રહ્યું હતું. ખાણ-ખનીજ વિભાગના અધિકારીઓએ દરોડો પાડીને આ આખા નેટવર્કને રંગેહાથ ઝડપી પાડવાનો પ્રયાસ કર્યો હતો. સ્થળ પરથી સરકારી સંપત્તિ અને નદીના નિવસનતંત્રને નુકસાન પહોંચાડીને લાખો રૂપિયાની રેતી ચોરી કરવાનું મોટું કૌભાંડ પ્રકાશમાં આવ્યું હતું.

સરકારી ટીમને જોઈને ખનીજ માફિયાઓમાં ભારે અફરાતફરી મચી ગઈ હતી. જોકે, કાયદાનો ડર રાખવાને બદલે ખનીજ માફિયાઓએ પોતાની દાદાગીરી બતાવી હતી. ખાણ-ખનીજ વિભાગના કર્મચારીઓ અને અધિકારીઓ જ્યારે સીઝિંગની કામગીરી કરી રહ્યા હતા, ત્યારે માફિયાઓએ ફરજ પરના કર્મચારીઓ સાથે ઘર્ષણ કરીને તેમને જાનથી મારી નાખવાની અને ગંભીર પરિણામો ભોગવવાની ધમકીઓ આપી હતી. સરકારી કામગીરીમાં રૂકાવટ ઊભી કરીને માફિયાઓએ પોતાની અસામાજિક માનસિકતા છતી કરી હતી