ભાવનગરમાં બનેલા નકલી દારૂકાંડ મામલે તપાસમાં મહત્વનો વળાંક આવ્યો છે. કેસમાં ઝડપાયેલા 13 આરોપીઓના 10 દિવસના રિમાંડ કોર્ટે મંજૂર કર્યા છે. હવે પોલીસ આરોપીઓની પૂછપરછ કરીને સમગ્ર કાંડની પાછળની કડી શોધવાનો પ્રયાસ કરશે.આ નકલી દારૂકાંડમાં અત્યાર સુધી 7 લોકોના મોત થયા હોવાનું સામે આવ્યું છે, જ્યારે આશરે 18 લોકો અસરગ્રસ્ત બન્યા છે અને સારવાર હેઠળ હોવાનું જાણવા મળ્યું છે. ઘટનાની ગંભીરતાને પગલે પોલીસ અને સંબંધિત તંત્ર દ્વારા તપાસનો ધમધમાટ તેજ કરવામાં આવ્યો છે.

રિમાંડ દરમિયાન પોલીસ આરોપીઓ પાસેથી નકલી દારૂ તૈયાર કરવા અને તેનું વિતરણ કરવા અંગે મહત્વની માહિતી મેળવવાનો પ્રયાસ કરશે. ખાસ કરીને આ સમગ્ર નેટવર્કમાં કોણ-કોણ સામેલ હતું અને દારૂ ક્યાં તૈયાર કરવામાં આવ્યો હતો તે અંગે તપાસ આગળ વધારવામાં આવશે.તપાસમાં સૌથી મહત્વના સવાલોમાં મિથેનોલ ક્યાંથી મેળવવામાં આવ્યું અને તે આરોપીઓ સુધી કેવી રીતે પહોંચ્યું તે સામેલ છે. આ ઉપરાંત દારૂની બોટલો પર લગાવવામાં આવેલા નકલી સ્ટીકર ક્યાંથી લાવવામાં આવ્યા અને તેને તૈયાર કરનાર અથવા સપ્લાય કરનાર કોણ છે તે અંગે પણ પૂછપરછ થઈ શકે છે.

નકલી દારૂ તૈયાર કરવાની સમગ્ર પ્રક્રિયા, તેમાં વપરાયેલા કાચા માલ, બોટલિંગ અને વિતરણની ચેનલ અંગે પોલીસ વિગતો એકત્રિત કરશે. રિમાંડ દરમિયાન આરોપીઓ પાસેથી મળતી માહિતીના આધારે તપાસનો વ્યાપ વધુ વિસ્તરી શકે છે.સમગ્ર લઠ્ઠાકાંડની તપાસ SMC દ્વારા પણ હાથ ધરવામાં આવી રહી હોવાનું જણાવાયું છે. હવે આરોપીઓની પૂછપરછમાં મળતી માહિતીના આધારે નકલી દારૂકાંડની પાછળ રહેલા મુખ્ય લોકો અને સમગ્ર નેટવર્ક અંગે વધુ ખુલાસા થવાની શક્યતા છે.

ભાવનગર નકલી દારૂકાંડમાં SMC દ્વારા તપાસ તેજ કરવામાં આવી છે, જેમાં ૭ લોકોના મોત નીપજ્યાં છે અને 18 જેટલા લોકો સારવાર હેઠળ છે. કેસમાં પકડાયેલા 13 આરોપીઓના 10 દિવસના રિમાંડ મંજૂર કરવામાં આવ્યા છે. પોલીસ પૂછપરછ દરમિયાન મિથેનોલ ક્યાંથી લાવવામાં આવ્યું અને બોટલ પરના સ્ટીકરો ક્યાંથી આવ્યા તે સહિતના મોટા ખુલાસા થવાની શક્યતા છે.