રાજકોટ તા. ૨૧: ઉપલેટાના સમઢીયાળા ગામે રહેતાં અને ખેતી કરી ગુજરાન ચલાવતાં સામતભાઇ મુળુભાઇ હુણ-રબારી (ઉ.વ.૩૨) ઉપર સમઢીયાળા ગામના પેટ્રોલ પંપ નજીક ભાવેશ મેરાભાઇ ભારાઇ, નવઘણ ભુપતભાઇ ભારાઇ અને અજાણ્‍યા શખ્‍સોએ ધોકાથી હુમલો કરી બેફામ માર મારતાં માથા-હાથે-પગે, શરીરે ઇજાઓ થતાં સારવાર માટે રાજકોટ સિવિલ હોસ્‍પિટલમાં ખસેડાયેલ છે.

સામતભાઇ છ બહેન અને બે ભાઇમાં મોટા છે. સંતાનમાં બે દિકરી અને એક દિકરો છે. પોતે ખેતી કરી ગુજરાન ચલાવે છે. સામતભાઇના સગાએ જણાવ્‍યું હતું કે થોડા દિવસ પહેલા હુણ કુટુંબનો એક દિકરો સામેના કુટુંબની એક દિકરીને લઇને જતો રહ્યો હતો. આ દિકરા કે દિકરી સાથે સામતભાઇને કંઇ લેવા દેવા નથી. આમ છતાં કુટુંબ એક હોવાથી સામેવાળાએ સામતભાઇને વાત કરવાના બહાનને પંપ પાસે બોલાવ્‍યા હતાં. બાદમાં મંડળી રચી હુમલો કર્યો હતો. હોસ્‍પિટલ ચોકીના સ્‍ટાફે બનાવની જાણ પાટણવાવ પોલીસને કરતાં  આક્ષેપો અંગે તપાસ હાથ ધરવામાં આવી છે.