ભાવનગરમાં લઠ્ઠાકાંડ બાદ અમદાવાદ શહેર પોલીસ હરકતમાં આવી છે. DGPના આદેશ પછી 18થી 21 ઓગસ્ટ દરમિયાન શહેરના તમામ પોલીસ સ્ટેશન વિસ્તારોમાં સ્પેશિયલ ડ્રાઇવ યોજવામાં આવી હતી. 3 દિવસની આ કાર્યવાહી દરમિયાન પોલીસે 436 કેસ નોંધી 88 લાખ રૂપિયાનો મુદ્દામાલ જપ્ત કર્યો છે અને 476 આરોપીઓની અટકાયત કરી છે. ગુનાહિત ઇતિહાસ ધરાવતા 41 આરોપીઓ સામે પાસા  હેઠળ કાર્યવાહી કરાઈ છે. પોલીસે વ્યાજખોરી, શરીર સંબંધી અને મહિલા છેડતી જેવા ગુના આચરનારા અન્ય તત્વોનું લિસ્ટ પણ તૈયાર કરી લીધું છે. આગામી સમયમાં આ ગુનેગારો સામે પણ પાસાનું શસ્ત્ર ઉગામી કડકમાં કડક પગલાં ભરવાનો તખ્તો તૈયાર કરી લેવાયો છે.