મુકુંદ બદીયાણી દ્વારા, જામનગર: શહેરના પોશ ગણાતા શરૂસેક્શન રોડ વિસ્તારમાં આજે એક સનસનાટીભરી ઘટના સામે આવી છે, જેમાં એક વૃદ્ધની અજાણ્યા શખ્સો દ્વારા કરપીણ હત્યા કરવામાં આવતા સમગ્ર પંથકમાં ભારે ચકચાર મચી ગઈ છે. ભરબજારે બનેલી આ લોહિયાળ ઘટનાને પગલે સ્થાનિક લોકોમાં ફફડાટ વ્યાપી ગયો છે.
પ્રાપ્ત થતી પ્રાથમિક વિગતો મુજબ, શરૂસેક્શન રોડ વિસ્તારમાં રહેતા ૭૦ વર્ષીય વૃદ્ધ દેવાયતભાઈ વારોતરીયા પર કોઈ અગમ્ય કારણોસર બે અજાણ્યા શખ્સોએ તીક્ષ્ણ હથિયાર વડે ઘાતકી હુમલો કર્યો હોવાની પ્રબળ આશંકા વ્યક્ત કરવામાં આવી રહી છે. હુમલાખોરોએ દેવાયતભાઈ પર હથિયારો વડે એટલો ગંભીર અને ઉપરાઉપરી હુમલો કર્યો હતો કે લોહીલુહાણ હાલતમાં ગંભીર રીતે ઇજાગ્રસ્ત થયેલા વૃદ્ધનું કોઈ પણ પ્રકારની સારવાર મળે તે પહેલા જ ઘટનાસ્થળે કમકમાટીભર્યું મોત નીપજ્યું હતું.
હત્યાના આ હૃદયદ્રાવક બનાવની જાણ આસપાસના લોકો દ્વારા તાત્કાલિક પોલીસને કરવામાં આવતા જ ઉચ્ચ અધિકારીઓ સહિતનો પોલીસ કાફલો વિલંબ કર્યા વિના ઘટનાસ્થળે દોડી આવ્યો હતો. પોલીસે તુરંત જ મૃતદેહનો કબજો સંભાળી તેને પોસ્ટમોર્ટમ અર્થે ખસેડવાની તજવીજ હાથ ધરી હતી અને સમગ્ર ઘટનાસ્થળનું બારીકાઈથી નિરીક્ષણ કરી કાયદેસરની તપાસ શરૂ કરી હતી.
પોલીસની પ્રાથમિક તપાસમાં બહાર આવેલી વિગતો અનુસાર, આ ઘાતકી હત્યાકાંડમાં બે શખ્સોની સીધી સંડોવણી હોવાની દિશામાં પોલીસ તપાસ આગળ વધી રહી છે. આ વૃદ્ધની હત્યા પાછળનું ચોક્કસ કારણ શું છે અને લૂંટના ઈરાદે કે કોઈ જૂની અદાવતમાં આ હત્યાને અંજામ આપવામાં આવ્યો છે તે જાણવા માટે પોલીસે અલગ-અલગ દિશામાં તપાસના ચક્રો ગતિમાન કર્યા છે. આ સાથે જ અજાણ્યા હત્યારા આરોપીઓની સચોટ ઓળખ મેળવી તેમને વહેલી તકે ઝડપી પાડવા માટે આસપાસના સીસીટીવી ફૂટેજ મેળવવાની તજવીજ પણ હાથ ધરવામાં આવી છે. સમગ્ર હાઈપ્રોફાઈલ વિસ્તારમાં બનેલી આ હત્યાની ઘટનાને પગલે જામનગરમાં ભારે ગરમાવો આવી ગયો છે. (તસ્વીર - કિંજલ કારસરિયા, જામનગર)