(વિનોદ ગાલા દ્વારા)ભુજ તા.૧૪ :  અંજાર શહેરના માધવબાગ સોસાયટી વિસ્તારમાં મહિલા દર્શનાર્થે જઈ રહ્યા હતા ત્યારે તેમના ગળામાંથી સોનાની ચેઇન આંચકીને ફરાર થઈ ગયેલી તસ્કર ગેંગને અંજાર પોલીસે ગણતરીના કલાકોમાં ઝડપી પાડી છે.પોલીસે આરોપીઓ પાસેથી ૪૫,૦૦૦ની કિંમતની સોનાની ચેઇન રિકવર કરી કાયદેસરની કાર્યવાહી હાથ ધરી છે.બનાવની વિગતે વાત કરીએ તો ગત તા. ૧૧/૦૯/૨૦૨૬ના સાંજના આશરે પાંચેક વાગ્યે ફરીયાદી મહિલા જંગલેશ્વર મહાદેવના દર્શન કરવા નીકળ્યા હતા.તેઓ નગરપાલિકા પાછળ આવેલી માધવબાગ સોસાયટી નજીક હનુમાનદાદાના મંદિર પાસે પહોંચ્યા ત્યારે બાઇક પર આવેલા ત્રણ અજાણ્યા ઇસમોએ મહિલાના ગળામાંથી આશરે દોઢ તોલા (કિંમત રૂ. ૪૫,૦૦૦)ની સોનાની ચેઇન ઝૂંટવી લીધી હતી અને ફરાર થઈ ગયા હતા. સમગ્ર ધટનાનો સીસીટીવી સામે આવ્યો હતો. જેમાં મહિલાને પછાડી બાઇક પર આવેલા શખ્સે તેની પાસેથી ચેન આંચકી અને ફરાર થઇ ગયા હતા.બનાવ અંગે ફરિયાદ નોંધાતા જ અંજાર પી.આઈ. એચ.એ.જાડેજા અને તેમની ટીમે તપાસનો ધમધમાટ શરૂ કર્યો હતો.પોલીસે “સેફ ઈસ્ટ-કચ્છ કેમ્પેઈન”હેઠળ વિસ્તારના CCTV ફૂટેજ તપાસીને આરોપીઓની ઓળખ છતી કરી હતી.ત્યારબાદ ટેકનિકલ સર્વેલન્સ અને બાતમીદારોની મદદથી ત્રણેય આરોપીઓને દબોચી લેવામાં આવ્યા હતા.ઝડપાયેલા આરોપીઓમાં ગોવિંદસિંઘ સતકારસિંઘ સરદાર (ઉ.વ. ૨૦, રહે. દુધડેરી વિસ્તાર,રાપર) મુખ્ય આરોપી (ચેઇન ઝૂંટવનાર) અમીત રમેશ માલી (ઉ.વ. ૨૧, રહે.શેરી નં. ૦૭,ગેલીવાડી, રાપર) તથા વિકી ગોવિંદ દેવીપૂજક (ઉ.વ.૨૨,રહે. સમાવાસ,અલજીબાપુવાસ, રાપર)નો સમાવેશ થાય છે.પોલીસ પૂછપરછમાં આરોપીઓએ ગુનાની કબૂલાત કરી હતી કે તેઓ બાઇક લઈને અંજારમાં આટાફેરા મારતા હતા.નગરપાલિકા પાછળ એકલી મહિલાને જોઈને તકનો લાભ ઉઠાવી સોનાની ચેઇન ખેંચી ભાગી છૂટ્યા હતા.આરોપી અમીત માલી સામે અગાઉ પણ રાપર પોલીસ સ્ટેશનમાં પ્રોહિબિશનનો ગુનો નોંધાયેલો છે.પોલીસે ત્રણેય સામે ગુનો નોંધી આગળની તપાસ હાથ ધરી છે.ભરચક વિસ્તાર અને ધોળા દિવસે બનેલી ચિલઝડપની ધટનાએ પોલીસની કાયદો વ્યવસ્થાની સ્થિતી સામે અનેક સવાલો ઉભા કર્યા હતા. જો કે પોલીસે ગણતરીના દિવસોમાં ભેદ ઉકેલી નાંખી આરોપીની વધુ પુછપરછ શરૂ કરી છે. (તસ્વીર: મુકેશ રાજગોર, રાપર)