ગાંધીનગર, તા. 17  :ગુજરાતમાં સૌરાષ્ટ્ર-કચ્છના દરિયાઈ માર્ગે ડ્રગ્સ ઘૂસાડવાનું એક મોટું આંતરરાષ્ટ્રીય કાવતરું સુરક્ષા એજન્સીઓએ નિષ્ફળ બનાવ્યું છે. ગુજરાત ATS અને ઇન્ડિયન કોસ્ટગાર્ડ દ્વારા સંયુક્ત રીતે હાથ ધરવામાં આવેલા ઓપરેશનમાં જખૌ બંદર નજીક દરિયામાંથી 300 કરોડ રૂપિયાની કિંમતનું 60 કિલો હેરોઈન ઝડપી પાડવામાં આવ્યું છે. આ કેસમાં 8 પાકિસ્તાની નાગરિકોની ધરપકડ કરવામાં આવી છે.

ગુજરાત ATSને ગુપ્ત બાતમી મળી હતી કે પાકિસ્તાનથી એક બોટ મારફતે મોટા પ્રમાણમાં ડ્રગ્સનો જથ્થો ગુજરાતના દરિયાકાંઠે ઉતારવાનો પ્રયાસ થઈ રહ્યો છે. આ બાતમીના આધારે ATS અને કોસ્ટગાર્ડે સંયુક્ત વોચ ગોઠવી હતી. શુક્રવારે મોડી રાત્રે જખૌથી લગભગ 35 નોટિકલ માઈલ દૂર ભારતીય જળસીમામાં એક શંકાસ્પદ પાકિસ્તાની ફિશિંગ બોટ દેખાઈ હતી. કોસ્ટગાર્ડના જહાજે બોટને આંતરીને તપાસ કરતા તેમાંથી 60 પેકેટ હેરોઈન મળી આવ્યું હતું. આંતરરાષ્ટ્રીય બજારમાં એક કિલો હેરોઈનની કિંમત લગભગ 5 કરોડ રૂપિયા આંકવામાં આવે છે.

પકડાયેલા આઠેય શખ્સો પાકિસ્તાનના કરાચીના રહેવાસી છે. પ્રાથમિક પૂછપરછમાં સામે આવ્યું છે કે આ જથ્થો પંજાબ અને દિલ્હી સુધી પહોંચાડવાનો હતો. ગુજરાતના દરિયાકાંઠાનો ઉપયોગ માત્ર ટ્રાન્ઝિટ પોઈન્ટ તરીકે કરવાનું કાવતરું હતું. ગુજરાતને નશાના કારોબારનું હબ બનાવવાના પ્રયાસને સુરક્ષા એજન્સીઓએ સમયસર નિષ્ફળ બનાવ્યો છે. પકડાયેલા આરોપીઓને ભુજ લાવીને વધુ પૂછપરછ હાથ ધરવામાં આવી છે.

ગૃહ રાજ્યમંત્રીએ આ સફળ ઓપરેશન બદલ ATS અને કોસ્ટગાર્ડની ટીમને અભિનંદન પાઠવ્યા છે. તેમણે કહ્યું કે ગુજરાતનો 1600 કિલોમીટર લાંબો દરિયાકિનારો હોવાથી દાણચોરો સતત ઘૂસણખોરીનો પ્રયાસ કરે છે. પરંતુ રાજ્ય સરકાર અને કેન્દ્રીય એજન્સીઓના સંકલનથી દરિયાઈ સુરક્ષા વધુ મજબૂત બનાવવામાં આવી છે. છેલ્લા બે વર્ષમાં ગુજરાતના દરિયાકાંઠેથી 5000 કરોડથી વધુનું ડ્રગ્સ પકડવામાં આવ્યું છે. આ કેસમાં ડ્રગ્સ સપ્લાય કરનાર અને લેનાર નેટવર્કની તપાસ માટે વધુ તપાસ ચાલુ છે.