ગોંડલ :કાળઝાળ ગરમીના કારણે ગોંડલ તાલુકાના પાટીયાળી ગામમાં એક ચિંતાજનક ઘટના સામે આવી છે. ગામની સીમ વિસ્તારમાં અચાનક ખજૂરીના વૃક્ષોમાં આગ ફાટી નીકળી હતી. સૂકા ઘાસ અને ગરમ પવનોને કારણે આગે જોતજોતામાં વિકરાળ સ્વરૂપ ધારણ કરી લીધું હતું, જેને પગલે ખેડૂતો અને સ્થાનિક રહીશોમાં દોડધામ મચી ગઈ હતી.

પાટીયાળી ગામની સીમમાં જ્યાં મોટી સંખ્યામાં ખજૂરીના વૃક્ષો આવેલા છે, ત્યાં એકાએક આગ લાગતા એક પછી એક વૃક્ષો લપેટમાં આવી ગયા હતા. ઊંચા વૃક્ષો હોવાથી આગની જ્વાળાઓ દૂર-દૂર સુધી દેખાઈ રહી હતી. ભારે ગરમીના કારણે વૃક્ષો અને આસપાસનું વાતાવરણ અત્યંત શુષ્ક હોવાથી આગ ઝડપથી પ્રસરી રહી હતી. આ આગમાં અનેક વૃક્ષો બળીને ખાખ થઈ ગયા છે, જેને કારણે પર્યાવરણ અને સ્થાનિક ખેતીને પણ નુકસાન થવાની ભીતિ સેવાઈ રહી છે.

સીમ વિસ્તારમાં ધુમાડાના ગોટેગોટા અને આગની જ્વાળાઓ જોતા જ સ્થાનિક લોકો તરત જ ઘટનાસ્થળે દોડી આવ્યા હતા. સ્થિતિ કાબૂ બહાર જતી જોઈ ગ્રામજનોએ તાત્કાલિક ગોંડલ ફાયર વિભાગને આ અંગે જાણ કરી હતી. ફાયર ફાઈટરોની ટીમ ઘટનાસ્થળે પહોંચીને આગ પર કાબૂ મેળવવાના પ્રયાસો હાથ ધર્યા છે. ખેતરોમાં અન્ય પાક કે સૂકું ઘાસ વધુ હોવાથી આગ અન્ય વિસ્તારોમાં ન ફેલાય તે માટે સ્થાનિકો પણ પોતાની રીતે પાણીનો છંટકાવ કરીને મદદ કરી રહ્યા છે.

પ્રાથમિક દ્રષ્ટિએ આ આગ લાગવાનું મુખ્ય કારણ અત્યારે પડી રહેલી અસહ્ય ગરમી અને લૂ હોવાનું મનાઈ રહ્યું છે. ઉનાળાની સિઝનમાં શુષ્ક પાંદડાઓ વચ્ચે ઘર્ષણ અથવા કાચના ટુકડા પર સૂર્યના સીધા કિરણો પડવાથી પણ આવી આગ લાગવાની સંભાવના રહેતી હોય છે. જોકે, સદનસીબે આ ઘટનામાં કોઈ જાનહાનિના સમાચાર નથી, પરંતુ કુદરતી સંપત્તિને મોટું નુકસાન પહોંચ્યું છે.