ભુજ : કચ્છ જિલ્લામાં છેલ્લા 24 કલાકમાં અકસ્માત અને આપઘાતની ચાર અલગ-અલગ ઘટનાઓ સામે આવતા અરેરાટી વ્યાપી ગઈ છે. માંડવી તાલુકાના ગઢશીશા ગામે બનેલી વિચિત્ર ઘટનામાં બે ઊંટ વચ્ચેની લડાઈમાં ગામના સામાજિક અગ્રણી વાલજી રામા આહીર (ઉ.વ. 55) નું મોત નીપજ્યું છે. શુક્રવારે સાંજે વાલજીભાઈ પોતાના ખેતરેથી ઘરે પરત ફરી રહ્યા હતા ત્યારે રસ્તામાં બે બેકાબૂ ઊંટ લડી રહ્યા હતા. તેઓ વચ્ચે આવી જતા એક ઊંટે તેમને જોરથી ફંગોળ્યા હતા, જેથી માથામાં ગંભીર ઈજા થતાં ઘટનાસ્થળે જ તેમનું મોત થયું હતું.

બીજી ઘટનામાં માંડવી શહેરમાં 22 વર્ષીય યુવક સુનીલ ગઢવીએ અગમ્ય કારણોસર પોતાના ઘરે ગળેફાંસો ખાઈ જીવન ટૂંકાવ્યું છે. જ્યારે ભુજ રેલવે સ્ટેશન નજીક 48 વર્ષીય આધેડે ટ્રેન નીચે પડતું મૂકી આપઘાત કર્યો છે. તેમની ઓળખ હજુ થઈ શકી નથી. 

આ ઉપરાંત ભચાઉ-સામખિયાળી હાઇવે પર શુક્રવારે મોડી રાત્રે કાર અને ટ્રક વચ્ચે ગમખ્વાર અકસ્માતમાં કારચાલક યુવાનનું મોત નીપજ્યું છે. પોલીસે તમામ ઘટનાઓમાં અકસ્માત મોતના ગુના નોંધી તપાસ હાથ ધરી છે.