(મુકુંદ બદિયાણી દ્વારા)જામનગર તા.૧૭ : જામનગર શહેરના વ્યસ્ત ગણાતા દિગ્જામ સર્કલ પાસે આજે સવારે એક અણધાર્યો અકસ્માત સર્જાતા ટૂંક સમય માટે અફરાતફરીનો માહોલ સર્જાયો હતો. નવીનીકરણના કામને કારણે પહેલેથી જ ટ્રાફિકથી ત્રસ્ત આ વિસ્તારમાં બેકાબૂ ટ્રક સર્કલમાં ઘૂસતા લોકોમાં કુતુહલ સાથે ભયનો માહોલ જોવા મળ્યો હતો.

શહેરના દિગ્જામ સર્કલથી ખોડીયાર કોલોની તરફ જતા મુખ્ય માર્ગ પર છેલ્લા ઘણા સમયથી નવીનીકરણનું કામ પ્રગતિમાં છે. જેના કારણે આ માર્ગ પર દરરોજ ટ્રાફિકની સમસ્યા અને વાહનોની ભીડ જોવા મળે છે.

આજે સવારે એક ટ્રક ચાલક દિગ્જામ સર્કલ પાસેથી પસાર થઈ રહ્યો હતો તે દરમિયાન કોઈ કારણસર તેણે પોતાના વાહન પરથી કાબૂ ગુમાવી દીધો. ઝડપી ગતિએ આવતો બેકાબૂ ટ્રક સીધો રસ્તાની વચ્ચોવચ આવેલા *દિગ્જામ સર્કલની લોખંડની રેલિંગ સાથે અથડાયો અને રેલિંગને તોડીને સર્કલની અંદર સુધી ઘૂસી ગયો.

આ જોરદાર અથડામણમાં સર્કલની રેલિંગને વ્યાપક નુકસાન થયું છે. અકસ્માતનો અવાજ સાંભળીને આસપાસના વાહનચાલકો અને સ્થાનિકો તાત્કાલિક ઘટના સ્થળે એકઠા થઈ ગયા હતા.

આ ગંભીર અકસ્માતમાં સદનસીબે ટ્રક ચાલકને તેમજ અન્ય કોઈ રાહદારી કે વાહનચાલકને કોઈ પ્રકારની ઈજા થઈ નથી.મોટી દુર્ઘટના ટળતા લોકોએ રાહતનો શ્વાસ લીધો હતો.

ઘટનાની જાણ થતા જ તંત્ર દોડતું થયું હતું. જામનગર મહાનગરપાલિકાની ટીમ અને સીટી સી. ડિવિઝન પોલીસની ટીમ તાત્કાલિક ઘટના સ્થળે પહોંચી ગઈ હતી. પોલીસે બેકાબૂ બનેલા ટ્રકને કબજે કરી લઈને આગળની કાનૂની કાર્યવાહી શરૂ કરી છે. અકસ્માતનું ચોક્કસ કારણ જાણવા માટે ચાલકની પૂછપરછ કરવામાં આવી રહી છે.

અકસ્માત બાદ થોડા સમય માટે આ વિસ્તારમાં ટ્રાફિક ધીમો પડ્યો હતો. પોલીસ દ્વારા તાત્કાલિક ટ્રાફિકને નિયંત્રિત કરીને વૈકલ્પિક માર્ગે ડાયવર્ટ કરવામાં આવ્યો હતો. 

બીજી તરફ, તૂટેલી રેલિંગને કારણે સર્કલની સુંદરતાને નુકસાન થયું છે. મહાનગરપાલિકા દ્વારા તૂટેલી રેલિંગને જલ્દીથી રિપેર કરવાની કામગીરી

 હાથ ધરવામાં આવશે તેવું જાણવા મળ્યું છે.

નવીનીકરણના કામને કારણે આ વિસ્તારમાં અવારનવાર ટ્રાફિક સમસ્યા સર્જાતી હોય છે ત્યારે આજના અકસ્માત બાદ તંત્ર દ્વારા સાવચેતીના પગલા લેવાની માંગ પણ સ્થાનિકોએ કરી છે.