(મુકુંદ બદીયાની દ્વારા)  જામનગર: જામનગર શહેરમાં અંધાશ્રમ ફાટક નજીક રેલવે ટ્રેકની બાજુમાં આવેલી આવાસીય વસાહત પાસેથી પસાર થતી ખુલ્લી ગટરની કેનાલમાંથી એક અજાણ્યા યુવાનનો મૃતદેહ મળી આવવાની ચોંકાવનારી ઘટના સામે આવી છે. યુવાનનો શબ મળવાના આ બનાવને પગલે આસપાસના વિસ્તારમાં ભારે ચકચાર મચી જવા પામી છે.
ઘટનાની જાણ થતાં જ સ્થાનિક તંત્ર હરકતમાં આવ્યું હતું અને ફાયર વિભાગની ટીમ તાત્કાલિક ઘટનાસ્થળે દોડી ગઈ હતી. ફાયર જવાનો દ્વારા ભારે જહેમત બાદ કેનાલમાંથી મૃતદેહને બહાર કાઢવાની કામગીરી હાથ ધરવામાં આવી હતી.
બનાવની ગંભીરતાને ધ્યાનમાં રાખીને પોલીસ પણ ત્વરિત ઘટનાસ્થળે પહોંચી હતી અને સમગ્ર માર્મે તપાસ શરૂ કરી છે. હાલમાં મૃતક યુવાનની ઓળખ પ્રસ્થાપિત કરવાના પ્રયાસો હાથ ધરવામાં આવ્યા છે. આ યુવાનનું મોત કયા સંજોગોમાં અને કેવી રીતે થયું તેમજ તેની પાછળનું ચોક્કસ કારણ શું છે તે જાણવા પોલીસે ઊંડાણપૂર્વકની તપાસ આદરી છે. કાનૂની અને તબીબી પ્રક્રિયા પૂર્ણ થયા બાદ જ મૃત્યુ પાછળનું સાચું રહસ્ય બહાર આવશે.