પ્રભાસપાટણ, તા. ૭ : પવિત્ર શ્રાવણ માસના અંતિમ સોમવારે પ્રથમ જ્યોતિર્લિંગ સોમનાથ મહાદેવનાં દર્શન માટે વહેલી સવારથી જ હજારો શ્રદ્ધાળુઓ ઊમટી પડ્યા હતા. મંદિર પરિસર અને સમગ્ર સોમનાથ તીર્થ ‘હર હર મહાદેવ’ તથા ‘ઓમ નમઃ શિવાય’ના નાદથી ગુંજી ઊઠ્યું હતું.

ભક્તોની ભારે ભીડને ધ્યાનમાં રાખીને મંદિરનાં દ્વાર નિયમિત સમય કરતાં વહેલા ખોલવામાં આવ્યા હતા. શ્રદ્ધાળુઓએ શિસ્તબદ્ધ કતારમાં રહી સોમનાથ મહાદેવનાં દર્શન, જળાભિષેક અને પૂજા કરી હતી. શ્રાવણ દરમિયાન પ્રત્યક્ષ યજમાનો માટે મહામૃત્યુંજય યજ્ઞ સહિત વિવિધ ધાર્મિક અનુષ્ઠાનો પણ યોજાઈ રહ્યાં છે.

ભીડનું સુચારુ સંચાલન કરવા મંદિર ટ્રસ્ટ, પોલીસ, સુરક્ષા કર્મચારીઓ અને સ્વયંસેવકો તૈનાત કરવામાં આવ્યા હતા. વાહનવ્યવસ્થા, પ્રવેશ-નિર્ગમન, આરોગ્યસહાય અને પીવાના પાણી સહિતની સુવિધાઓ ગોઠવાઈ હતી. સાંજે સોમનાથનાં વિવિધ સ્થળોએ સાંસ્કૃતિક કાર્યક્રમોનું પણ આયોજન કરવામાં આવ્યું છે.