ભાવનગર જિલ્લાના પાલીતાણા પંથકમાંથી ગ્રામીણ બેન્ક સાથે સંકળાયેલી છેતરપિંડી અને વિશ્વાસઘાતની એક મોટી ઘટના સામે આવી છે. પાલીતાણામાં રૂ. 22.70 લાખની રકમની હેરાફેરી અને વિશ્વાસઘાત મામલે પાલીતાણા રૂરલ પોલીસે સરાહનીય કામગીરી કરતા ગણતરીની જ કલાકોમાં સમગ્ર ગુનાનો ભેદ ઉકેલી નાખ્યો છે. આ કેસમાં મુખ્ય આરોપીને ઝડપી પાડવામાં સફળતા મેળવી છે.

પ્રાપ્ત માહિતી અનુસાર, પાલીતાણાના દૂધાળા ગામના રહેવાસી ભરત ગુણવંતભાઈ ત્રિવેદી વિરુદ્ધ રૂ. 22.70 લાખની છેતરપિંડીનો ગુનો નોંધવામાં આવ્યો હતો. આ ગંભીર ગુનાને પગલે પાલીતાણા રૂરલ પોલીસ સ્ટેશન દ્વારા તાત્કાલિક અલગ-અલગ ટીમો બનાવવામાં આવી હતી. પોલીસે હ્યુમન સોર્સિસ (માનવીય બાતમીદારો) અને ટેકનિકલ સર્વેલન્સની મદદથી વોચ ગોઠવીને આરોપી ભરત ત્રિવેદીને ગણતરીના કલાકોમાં જ દબોચી લીધો હતો. આ મામલે પાલીતાણા રૂરલ પોલીસ સ્ટેશનમાં BNS ની સંબંધિત કલમો હેઠળ ગુનો દાખલ કરવામાં આવ્યો છે.

પકડાયેલા આરોપીને પોલીસ દ્વારા કોર્ટમાં રજૂ કરવામાં આવ્યો હતો અને ઊંડાણપૂર્વક પૂછપરછ તથા નાણાંની રિકવરી માટે 7 દિવસના રિમાન્ડની માંગણી કરવામાં આવી હતી. અદાલતે પોલીસની દલીલો ગ્રાહ્ય રાખીને આરોપીના 4 દિવસના પોલીસ રિમાન્ડ મંજૂર કર્યા છે. હાલ પોલીસ દ્વારા રિમાન્ડ દરમિયાન આરોપીની કડક પૂછપરછ હાથ ધરવામાં આવી છે, જેમાં છેતરપિંડીના નાણાં ક્યાં અને કેવી રીતે વાપરવામાં આવ્યા તેમજ આ પ્રકરણમાં અન્ય કોઈની સંડોવણી છે કે કેમ તે અંગેની વધુ વિગતો બહાર આવવાની પૂરી શક્યતા છે.