ભાવનગર, તા. 16 : ભાવનગર શહેરમાં બાપા સીતારામ ક્રેડિટ કો-ઓપરેટિવ સોસાયટીની ઓફિસ છેલ્લા ત્રણ દિવસથી અચાનક બંધ થઈ જતાં કરોડો રૂપિયાના કૌભાંડની આશંકા સેવાઈ રહી છે. સોસાયટીમાં રોકાણ કરનારા સેંકડો લોકોના નાણાં ફસાતા રોષ અને ભયનો માહોલ ફેલાયો છે.

શહેરના કાળિયાબીડ વિસ્તારમાં આવેલી બાપા સીતારામ ક્રેડિટ સોસાયટી છેલ્લા 8 વર્ષથી કાર્યરત હતી. સોસાયટી દ્વારા ઊંચા વ્યાજની લાલચ આપીને નાના વેપારીઓ, ગૃહિણીઓ અને નિવૃત્ત કર્મચારીઓ પાસેથી રોકાણ કરાવવામાં આવ્યું હતું. અંદાજે 3 હજારથી વધુ લોકોએ સોસાયટીમાં ફિક્સ ડિપોઝિટ અને રિકરિંગ ખાતામાં રોકાણ કર્યું હતું.

છેલ્લા ત્રણ દિવસથી સોસાયટીની ઓફિસ બંધ છે અને સંચાલકોના મોબાઈલ ફોન પણ સ્વિચ ઓફ આવી રહ્યા છે. શુક્રવારે સવારે રોકાણકારો પૈસા ઉપાડવા માટે ઓફિસે પહોંચ્યા ત્યારે તાળું મારેલું જોવા મળ્યું હતું. વારંવાર ફોન કરવા છતાં સંચાલકોનો સંપર્ક ન થતાં લોકો એકઠા થઈ ગયા હતા અને હોબાળો મચાવ્યો હતો.

રોકાણકારોના જણાવ્યા મુજબ સોસાયટીમાં અંદાજે 15 થી 20 કરોડ રૂપિયાનું રોકાણ છે. છેલ્લા એક મહિનાથી વ્યાજ અને મુદ્દત પૂરી થયેલી ડિપોઝિટની રકમ ચૂકવવામાં વિલંબ થઈ રહ્યો હતો. સંચાલકો ટેક્નિકલ કારણો આગળ ધરીને સમય માંગતા હતા. જોકે હવે ઓફિસ જ બંધ થઈ જતાં લોકોના પૈસા ડૂબી જવાનો ભય વ્યક્ત કરવામાં આવી રહ્યો છે.

ઘટનાની જાણ થતાં જ મોટી સંખ્યામાં રોકાણકારો નીલમબાગ પોલીસ સ્ટેશને પહોંચી ગયા હતા. પોલીસે પ્રાથમિક તપાસ શરૂ કરી છે અને સંચાલકોની શોધખોળ હાથ ધરી છે. સોસાયટીના ચેરમેન અને મેનેજર સહિત ત્રણ મુખ્ય સંચાલકો ફરાર હોવાનું જાણવા મળ્યું છે. પોલીસે રોકાણકારો પાસેથી અરજીઓ સ્વીકારવાની શરૂઆત કરી છે અને રજિસ્ટ્રાર ઓફ કો-ઓપરેટિવ સોસાયટીઝને પણ જાણ કરવામાં આવી છે.