(દિપક કકકડ દ્વારા)વેરાવળ તા.૨૧ : વેરાવળમાં થયેલ ચકચારી ફાયરિંગ વિથ મર્ડરની ઘટનામાં વેરાવળ પોલીસને મોટી સફળતા મળી છે. પોલીસે ગણતરીના કલાકોમાં જ આ ગુનાને અંજામ આપનાર ચારેય આરોપીઓને ઝડપી લીધા છે. પોલીસની આ ઝડપી કાર્યવાહીથી સમગ્ર પંથકમાં રાહતની લાગણી ફેલાઈ છે.

પ્રાપ્ત વિગતો મુજબ, વેરાવળમાં થયેલ ફાયરિંગની ઘટનામાં એક વ્યક્તિની હત્યા નિપજી હતી. ઘટનાની ગંભીરતાને ધ્યાને લઈ પોલીસે તાત્કાલિક અલગ-અલગ ટીમો બનાવી આરોપીઓને પકડવા ચક્રો ગતિમાન કર્યા હતા. પોલીસની સઘન તપાસ અને બાતમીદારોના નેટવર્કના આધારે ગણતરીના કલાકોમાં જ ફાયરિંગ કરનાર એફ.એમ. ગ્રૂપના ફારૂક મૌલાના સહિત ચારેય આરોપીઓને ઝડપી પાડવામાં પોલીસને સફળતા મળી હતી.

પોલીસની પ્રાથમિક પૂછપરછમાં ચોંકાવનારો ખુલાસો થયો છે. ચારેય આરોપીઓએ કબૂલાત કરી છે કે આ હત્યા ઘંધાકીય અદાવતમાં કરવામાં આવી હતી. આરોપીઓ અને મૃતક વચ્ચે ધંધાને લઈને લાંબા સમયથી મનદુઃખ ચાલતું હતું, જેનું પરિણામ આ હત્યામાં આવ્યું હતું.

હાલ પોલીસે ચારેય આરોપીઓની ધરપકડ કરી વધુ પૂછપરછ હાથ ધરી છે. હત્યામાં વપરાયેલ હથિયાર કબ્જે કરવા સહિતની કાર્યવાહી શરૂ કરવામાં આવી છે. આ ગુનામાં અન્ય કોઈની સંડોવણી છે કે કેમ તે દિશામાં પણ તપાસ તેજ કરવામાં આવી છે.

વેરાવળ પોલીસની આ ત્વરિત અને નક્કર કામગીરીની ચારે તરફ પ્રશંસા થઈ રહી છે. ગણતરીના કલાકોમાં જ હત્યારાઓને ઝડપી લેવાતા લોકોમાં પોલીસ પ્રત્યે વિશ્વાસ વધુ મજબૂત બન્યો છે.