ભાવનગર જિલ્લાના વલ્લભીપુર નગરપાલિકામાં હાલમાં ‘પ્રતિનિધિરાજ’ ચાલી રહ્યું હોવાના આક્ષેપો સાથે રાજકીય ગરમાવો જોવા મળી રહ્યો છે. આ આક્ષેપો કોઈ વિરોધ પક્ષ દ્વારા નહીં, પરંતુ સ્વયં ભાજપના જિલ્લા મંત્રી નીતિન ભોરણીયા દ્વારા કરવામાં આવ્યા છે, જેના કારણે સત્તાધારી પક્ષમાં પણ આંતરિક વિખવાદ સ્પષ્ટપણે સામે આવ્યો છે 

નીતિન ભોરણીયાએ આકરા પ્રહારો કરતા જણાવ્યું હતું કે, નગરપાલિકામાં ચૂંટાયેલા જનપ્રતિનિધિઓના સ્થાને તેમના દ્વારા નિયુક્ત કરવામાં આવેલા અનધિકૃત પ્રતિનિધિઓ વહીવટી કામકાજ કરી રહ્યા છે. ખાસ કરીને મહિલા નગરસેવકો  ના કિસ્સામાં આ ગંભીર સમસ્યા જોવા મળી રહી છે. નિયમ મુજબ જે મહિલા સભ્યોએ લોકશાહી ઢબે કામ કરવાનું હોય છે, તેમના સ્થાને તેમના પતિઓ પાલિકા કચેરીમાં હાજરી આપે છે અને મહત્વના નિર્ણયોમાં દખલગીરી કરે છે.

માત્ર પતિઓ જ નહીં, પરંતુ મહિલા સભ્યોના અન્ય પરિવારજનો પણ વહીવટી પ્રક્રિયામાં સક્રિયપણે ભાગ લેતા હોવાનું સામે આવ્યું છે. આ ‘ડમી લોકો’ના હસ્તક્ષેપને કારણે વહીવટી તંત્રની પારદર્શિતા સામે મોટા પ્રશ્નાર્થ ચિહ્નો ઊભા થયા છે.

આ આક્ષેપો બાદ વલ્લભીપુરના રાજકીય વર્તુળોમાં ભારે ચર્ચા જાગી છે. નગરપાલિકાના વહીવટમાં ચૂંટાયેલા પ્રતિનિધિઓની જવાબદારી અને સત્તાના દુરૂપયોગ અંગે હવે સવાલો ઉઠી રહ્યા છે. શું ખરેખર નગરપાલિકામાં ચૂંટાયેલા સભ્યોને બદલે અન્ય લોકો વહીવટ ચલાવે છે? આ પ્રશ્નનો જવાબ જાણવા માટે હવે વહીવટી તંત્ર અને ભાજપના મોવડી મંડળની શું પ્રતિક્રિયા રહેશે, તે જોવું રહ્યું