(મુકુંદ બદિયાણી દ્વારા) જામનગર, તા.૨૮: જામનગર મહાનગરપાલિકાની ચૂંટણી ૨૦૨૬માં ભાજપે ઇતિહાસ રચ્‍યો છે. લઘુમતી બહુલ માનવામાં આવતા વોર્ડ નં. ૧માં ભાજપે પ્રથમવાર ક્‍લીન સ્‍વીપ નોંધાવી કોંગ્રેસને ભારે ઝટકો આપ્‍યો છે.

આ વોર્ડમાં વર્ષોથી કોંગ્રેસનો મજબૂત દબદબો રહ્યો હતો અને ભાજપ અહીં પોતાનું ખાતું પણ ખોલાવી શકતું નહોતું. પરંતુ આ વખતની ચૂંટણીમાં પરિસ્‍થિતિ સંપૂર્ણપણે બદલાઈ ગઈ છે. મતદારોમાં ભાજપ તરફ ભારે ઝોક જોવા મળ્‍યો હતો, જેના પરિણામે ભાજપની આખી પેનલ વિજેતા બની છે.

ખાસ વાત એ છે કે આ વોર્ડમાં જામનગર શહેર કોંગ્રેસના પ્રમુખ દિગુભા જાડેજા પોતે મેદાનમાં ઉતર્યા હતા. લઘુમતી વિસ્‍તાર હોવાને કારણે તેઓ આ સીટને સુરક્ષિત માનતા હતા, પરંતુ પરિણામે તેમને કારમી હારનો સામનો કરવો પડ્‍યો છે.

ભાજપની આ જીતને મોટા અપસેટ તરીકે જોવામાં આવી રહી છે, જ્‍યારે કોંગ્રેસ માટે આ પરિણામ ભારે ઝાટકા સમાન છે. સમગ્ર શહેરમાં આ પરિણામ ચર્ચાનો વિષય બન્‍યું છે અને ભાજપના કાર્યકરોમાં ભારે ઉત્‍સાહનો માહોલ જોવા મળી રહ્યો છે