બોટાદ, તા.૮: બોટાદ શહેરે આજે કોમી એકતા અને ભાઈચારાનું અનોખું ઉદાહરણ પૂરું પાડ્‍યું છે. જાણીતા ગૌરક્ષક સામતભાઈ જેબલીયાની અધ્‍યક્ષતામાં હિન્‍દુ-મુસ્‍લિમ બંને સમાજના ધર્મગુરુઓ અને આગેવાનોએ એકમંચ પર આવી ગાય માતાને રાષ્ટ્રીય માતાનો દરજ્‍જો આપવાની માંગ સાથે કલેક્‍ટર કચેરીએ આવેદનપત્ર પાઠવ્‍યું હતું.

આ પ્રસંગે ઈસ્‍લામિક ધર્મના પ્રમુખ મૌલાના સોકતઅલ્‍લી, શનિદેવ મંદિરના મહંત શ્રી જાનકીદાસબાપુ, ભીડભંજન આશ્રમના મહંત શ્રી ભરતગીરીબાપુ તથા માતાજી તેમજ હિન્‍દુ-મુસ્‍લિમ સમાજના અગ્રણીઓ ઉપસ્‍થિત રહ્યા હતા. સૌએ સાથે મળી કોમી એકતાના દર્શન કરાવ્‍યા હતા.

ગૌરક્ષક સામતભાઈ જેબલીયા દ્વારા આપવામાં આવેલી યાદીમાં જણાવાયું છે કે ગૌરક્ષકોની આ માંગનું પ્રાર્થનાપત્ર વડાપ્રધાન અને રાષ્ટ્રપતિ સુધી પહોંચાડવામાં આવે અને અમારી યોગ્‍ય માંગ પૂરી કરવામાં આવે.

આ આવેદનપત્રમાં ગાય માતાને રાષ્ટ્રમાતાનો દરજ્‍જો આપવા સરકાર સમક્ષ ભારપૂર્વક રજૂઆત કરવામાં આવી છે. બંને સમાજના ધર્મગુરુઓ એકસાથે આવી માંગ કરતા બોટાદમાં કોમી સદ્ભાવનું વાતાવરણ સર્જાયું હતું.