(મહમદ રાઠોડ દ્વારા) વાંકાનેર તા. ૧ :..  આઇએમડીના ટેન ડેઝ ફોરકાસ્‍ટ મોડેલ મેપ્‍સમાં થોડા દિવસ પૂર્વે ૩૦ સપ્‍ટેમ્‍બરથી ચાર દિવસ સુધી સૌરાષ્‍ટ્ર સહિત રાજયના અન્‍ય વિસ્‍તારોમાં હળવા વરસાદી રાઉન્‍ડની સંભાવના જોવા મળતી હતી. પણ આ મોડેલ મેપ્‍સ હોઇ તેમાં ફેરફારો થતા જ હોય છે. એ મુજબ હવે આજે માત્ર આંશિક સંભાવના બચી છે. આવતીકાલથી છેક દસમી ઓકટોબર સુધી ગુજરાત વરસાદ વિહીન અને સ્‍વચ્‍છ આકાશ જોવા મળશે મોડેલ ફોરકાસ્‍ટ મેપ્‍સના આ નવા પરીવર્તનથી ૩૦ સપ્‍ટેમ્‍બરથી ચાર દિવસ સુધી જે હળવા વરસાદી રાઉન્‍ડની શકયતા જાગી હતી હવે તેનો છેદ ઉડેલો જોવા મળે છે.

ગુજરાતમાં આગામી દસ દિવસ સુધી કોઇ જ વરસાદી ગતિવિધી જોવા મળતી નથી. આ સમય ગાળામાં ગુજરાતમાંથી ચોમાસુ વિદાય લઇ ચુકયુ હશે.

જો હવે કોઇ મજબુત વેસ્‍ટર્ન ડીસ્‍ટર્બન્‍સ નીચેના ભાગેથી પસાર થાય અથવા અરબ સાગર કે બંગાળની ખાડીમાં કોઇ નવી સીસ્‍ટમ ઉદ્‌્‌ભવે તો જ રાજયમાં વરસાદની ફરી નવી સંભાવના ઉજાગર થાય. જો કે એ વરસાદ ચોમાસાનો નહીં પણ માવઠાનો ગણાશે.

દસ દિવસ પૂર્વેની આગાહી એટલે લાંબા ગાળાની અર્થાત લોંગ ફોરકાસ્‍ટ મોડેલ મેપ્‍સની હોઇ, તેમાં ફેરફારો થવા સંભવ રહે છે. માત્ર બે-કે-ત્રણ દિવસ પૂર્વેની આગાહીને ધ્‍યાને લેવી જ સત્‍યથી નજીક રહેતી હોય છે.