દીપેશ સામાણી દ્વારા, દ્વારકા : દેવભૂમિ દ્વારકા સ્થિત વિશ્વપ્રસિદ્ધ જગતમંદિર શ્રી દ્વારકાધીશ મંદિરમાં આગામી સમયમાં આવતા પવિત્ર યાત્રાધામના ઉત્સવો અને ધાર્મિક પર્વને ધ્યાનમાં રાખીને વહીવટી તંત્ર દ્વારા એક મહત્વપૂર્ણ નિર્ણય લેવામાં આવ્યો છે. પવિત્ર પુરુષોત્તમ એટલે કે અધિક જેઠ માસ દરમિયાન દેશ-વિદેશમાંથી આવતા લાખો વૈષ્ણવો અને શ્રદ્ધાળુઓ ભગવાન શ્રીજીના દર્શનનો વધુમાં વધુ લાભ સુખરૂપ રીતે લઈ શકે તેવા ઉમદા આશય સાથે શ્રીજીના દર્શન અને મંગલા આરતીના સમય ક્રમમાં વિશેષ ફેરફાર કરવામાં આવ્યો છે. આ અંગે વહીવટદાર કચેરી, શ્રી દ્વારકાધીશ મંદિર, દ્વારકા દ્વારા પત્ર ક્રમાંક AOSDWARKAT/0001/06/2026 અન્વયે તારીખ ૧ જૂન ૨૦૨૬ના રોજ એક સત્તાવાર જાહેર વિજ્ઞપ્તિ બહાર પાડીને તમામ વિગતો જાહેર કરવામાં આવી છે.

શ્રી દ્વારકાધીશ મંદિરના વહીવટદાર અને નાયબ કલેક્ટર (GAS) હિમાંશુ ચૌહાણના ડિજિટલ હસ્તાક્ષર સાથે જાહેર કરાયેલી વિગતો મુજબ, આગામી તારીખ ૦૨ જૂન ૨૦૨૬ થી તારીખ ૧૫ જૂન ૨૦૨૬ સુધી પવિત્ર પુરુષોત્તમ માસ નિમિત્તે દર્શનનો નવો ક્રમ અમલી બનશે. આ નિર્ધારિત દિવસો દરમિયાન શ્રીજીની મંગલા આરતી દરરોજ વહેલી સવારે ૦૫:૩૦ વાગ્યે કરવામાં આવશે. આરતી બાદ દર્શનાર્થીઓની ભારે ભીડને પહોંચી વળવા માટે મંગળા દર્શન સવારે ૦૫:૩૦ વાગ્યાથી શરૂ કરીને સવારના ૦૮:૦૦ વાગ્યા સુધી સતત ખુલ્લા રાખવામાં આવશે. આ સિવાયના સવાર તેમજ સાંજના અન્ય તમામ દર્શનના ક્રમ હંમેશ મુજબના નિત્ય ક્રમ પ્રમાણે જ યથાવત રહેશે.

મંદિર વહીવટી તંત્ર દ્વારા વધુમાં સ્પષ્ટતા કરવામાં આવી છે કે, પવિત્ર પુરુષોત્તમ માસ દરમિયાન મંદિરમાં ઉજવવામાં આવનારા વિવિધ ધાર્મિક ઉત્સવો અંગેના દર્શનના વિગતવાર કાર્યક્રમો માટે કચેરી દ્વારા અગાઉ તારીખ ૧૬ મે ૨૦૨૬ના રોજ જે જાહેર વિજ્ઞપ્તિ બહાર પાડવામાં આવી હતી, તે જ વહીવટી આદેશ મુજબ તમામ ઉત્સવો યથાવત રીતે ઉજવાશે. આ સાથે જ જે ભક્તો પ્રત્યક્ષ રીતે દ્વારકા આવી શકતા નથી, તેઓ પણ આ વિશેષ દર્શનનો લાભ લઈ શકે તે માટે મંદિરની સત્તાવાર વેબસાઇટ અને ઓફિશિયલ સોશિયલ મીડિયાના માધ્યમો પર ક્યુઆર કોડ (QR CODE) સ્કેન કરીને ડિજિટલ દર્શન કરવાની સુવિધા પણ પૂરી પાડવામાં આવી છે.

આ મહત્વપૂર્ણ જાહેર જનતાની જોગવાઈ અને વ્યવસ્થાના સુચારુ સંચાલન માટે કચેરી દ્વારા દેવભૂમિ દ્વારકા (ખંભાળીયા) ના માનનીય કલેક્ટર, જિલ્લા વિકાસ અધિકારી અને પોલીસ અધિક્ષકને સવિનય નકલ રવાના કરીને જાણ કરવામાં આવી છે. આ ઉપરાંત મંદિરની સુરક્ષા અને વ્યવસ્થા જાળવવાના ભાગરૂપે દ્વારકાના પ્રાંત અધિકારી, મંદિર સુરક્ષાના ડીવાયએસપી, પુજારી પ્રતિનિધિ, વારાદાર પુજારી, મામલતદાર, પોલીસ ઇન્સ્પેક્ટર, શારદાપીઠના વ્યવસ્થાપક તેમજ બેટ દેવસ્થાન સમિતિ (બેટ દ્વારકા) ના વ્યવસ્થાપકને પણ નકલ રવાના કરી જરૂરી સંકલન સાધવામાં આવ્યું છે.