( પ્રવિણ વ્યાસ દ્વારા ) મોરબી તાલુકાના નાની વાવડી ગામે ખેડૂતને બારખલીદાર કાયદા હેઠળ મળેલી જમીન દિવેલીયાની હોવાનો દાવો કરી જમીન પોતાના વડવાઓના નામે ચડાવવા અરજી કરનાર વાંધેદારોનો વિવાદ ફગાવી દઈ મોરબી જિલ્લા કલેક્ટરે મોરબી પ્રાંત અધિકારીના અગાઉના હુકમને રદ ક૨ી અરજદારોની તરફેણમાં ઐતિહાસિક ચુકાદો આપી કૃષિપંચ અને સ્પેશિયલ મામલતદાર મોરબીના પ્રમાણપત્ર મુજબ રેવન્યુ રેકર્ડમાં નોંધ પાડવા હુકમ કર્યો છે.
   આ કેસની વિગત જોઈએ તો મોરબી તાલુકાના નાની વાવડી ગામે આવેલી રેવન્યુ સર્વે નં. રપપ પૈકી ૧ અને સર્વે નં. ૫૦૯ ની ખેતીની જમીન વલમજીભાઈ જાદવજીભાઈ કાચરોલાના નામે ચાલતી હોય તેમને પોતાની હયાતીમાં વરસદારોના નામ દાખલ કરવા હકક કાર્યવાહી કરતા હક્ક પત્રકે નોંધ નંબર ૬૭૯૧થી તા.૨૭/૫/૨૦૨૬થી નોંધ દાખલ કરવામાં આવી હતી જેની સામે જલ્પેશગીરી મનહરગીરી ગૌસ્વામીએ વાંધો લેતા નોંધ તકરારી બની હતી અને નાયબ કલેક્ટર, મોરબી પ્રાંત દ્વારા તા. ૩૧/૦૭/૨૦૨૬ ના હુકમથી આ નોંધ નામંજૂર કરવામાં આવી હતી.
  નાયબ કલેકટરના હુકમ સામે અરજદારોએ કલેક્ટર સ્વપ્રિલ ખરેની કોર્ટમાં રીવિઝન અપીલ દાખલ કરી હતી. કલેક્ટર કોર્ટે તમામ પુરાવાઓ, જૂના ૭/૧૨ ના પાનાઓ તથા બારખલી કેસોની વિગતો ચકાસી ચુકાદો આપતા સ્પષ્ટ કર્યું હતું કે, અરજદારના વડવાઓ વર્ષ ૧૯૬૯ થી આ જમીન ખેડતા આવ્યા છે અને કાયમી કબજા હકક ધરાવે છે. કલેક્ટરે તેમના આદેશમાં સ્પષ્ટ કર્યું છે કે નાયબ કલેક્ટરનો અગાઉનો હુકમ ગેરવ્યાજબી હતો અને બારખલી કેસ નં. ર૭૦ તથા ૩૮૩ મુજબ અરજદારના વડવા ચતુર રવજીને આપવામાં આવેલ કાયમી કબજા હકક પ્રમાણપત્ર મુજબની નોંધ ગામ નમૂના નં. ૬ માં પ્રમાણિત કરવી જરૂરી છે. આ ચુકાદાથી ૭૪ વર્ષ જુના કબજા પરમાણપત્રના આધારને માન્યતા મળતા અરજદાર પરિવારને મોટી રાહત મળી છે.
  દેશમાં સ્વાતંત્ર્ય પૂર્વે અને તે પછી સૌરાષ્ટ્ર વિસ્તારમાં જમીનદારી અને બારખલી પદ્ધતિ પ્રવર્તતી હતી, જેમાં ગણોતિયાઓ શોષણનો ભોગ બનતા હતા. આ પ્રથા નાબૂદ ક૨વા માટે સૌરાષ્ટ્ર બારખલી નાબૂદી અધિનિયમ, ૧૯૫૧ ઘડવામાં આવ્યો હતો. આ કાયદા હેઠળ જમીન ખેડતા વાસ્તવિક ગણોતિયાઓને વિશેષ પ્રક્રિયા અને સ્પેશિયલ મામલતદાર સમક્ષ અરજી કરી કાયમી કબજા હકકનું પ્રમાણપત્ર મેળવવાનો અધિકાર આપવામાં આવ્યો હતો, જેથી ખેડૂતો જમીનના કાયદેસરના માલિક બની શકે.આ કેસમાં પણ અરજદાર વલમજી જાદવજી કાચરોલાના વડવાઓએ સ્પેશિયલ મામલતદાર સમક્ષ જમીન ખેડતા હોવાના પુરાવાઓ રજૂ કરી કબજા પ્રમાણપત્ર મેળવ્યા હતા.