( પ્રવિણ વ્યાસ દ્વારા )  મોરબીમાં લીલાપર રોડ પર આવેલા શ્રી શાંતિધામ ચેરીટેબલ ટ્રસ્ટ સંચાલિત ઇલેક્ટ્રિક સ્મશાન ખાતે 'શ્રી રામધૂન મોક્ષ ધૂન મંડળ' દ્વારા છેલ્લા એક વર્ષથી દરરોજ બપોરે 2 થી 6 વાગ્યા સુધી રામધૂન બોલાવવામાં આવે છે. આ ઉપરાંત, ધાર્મિક આસ્થાના પ્રતીક સમાન આ મંડળ દ્વારા દર મહિનાની અગિયારસ અને અમાસના દિવસે 12-12 કલાકની અખંડ રામધૂનનું પણ આયોજન કરવામાં આવે છે.
   આ રામધૂન મોક્ષ મંડળ હોલના એક વર્ષની પૂર્ણાહુતિ નિમિત્તે એક વિશેષ કાર્યક્રમ યોજાયો હતો. જેમાં મોરબીની સરસ્વતી શિશુ મંદિર સ્કૂલના ધોરણ 3 ના ભૂલકાઓએ ઉપસ્થિત રહીને આકર્ષક સાંસ્કૃતિક કાર્યક્રમ રજૂ કર્યો હતો. બાળકોએ મર્યાદા પુરુષોત્તમ ભગવાન શ્રી રામના જન્મથી લઈને તેમના રાજ્યાભિષેક સુધીના સંપૂર્ણ પ્રસંગોને નાટ્ય સ્વરૂપે ખૂબ જ આબેહૂબ રીતે રજૂ કરી ઉપસ્થિત સૌના મન મોહી લીધા હતા.
આ પાવન પ્રસંગે બાળકો અને શિક્ષણને પ્રોત્સાહન આપવા માટે દાતાઓ દ્વારા શિશુ મંદિરને દિલ ખોલીને આર્થિક અનુદાન આપવામાં આવ્યું હતું. જેમાં શાંતિધામ ચેરીટેબલ ટ્રસ્ટના ટ્રસ્ટી  દિલુભા ઉદયસિંહભાઇ જાડેજા ( જયદીપ ગ્રુપ ઓફ કંપની ) તરફથી  51,000, પ્રવીણભાઈ ભાલોડીયા તરફથી રૂ. 5,000 અને ચંદ્રકાંતભાઈ દફતરી તરફથી રૂ. 5,000 મળી કુલ રૂ. 1,12,000 શિશુ મંદિરને ભેટ સ્વરૂપે અર્પણ કરવામાં આવ્યા હતા.
આ ઉપરાંત, સ્વ. ઉદયસિંહ મનુભા જાડેજા (જયદીપ પરિવાર) તરફથી હસ્તે દિલુભા શિશુ મંદિરના તમામ બાળકોને ભણતર માટે ઉપયોગી એવી શૈક્ષણિક કિટ (જેમાં સ્કૂલ બેગ, કંપાસ, પેન અને ચોપડા) પણ અર્પણ કરવામાં આવી હતી