(પ્રવિણ વ્‍યાસ દ્વારા) મોરબી તા ૨૬: જેતપર ગામમાં છેલ્લા આઠ દિવસથી ચાલી રહેલા ખેડૂત ઉપવાસ આંદોલનને સમર્થન આપવા માટે ગત રાત્રીએ વિશેષ નાટક ‘‘અદાણીનો અત્‍યાચાર ને ખેડુતોની દુર્દશા''નું આયોજન કરવામાં આવ્‍યું હતુ. આ કાર્યક્રમમાં ખેડૂતો અને મહિલાઓનો અભૂતપૂર્વ ઉત્‍સાહ જોવા મળી મળ્‍યો હતો.

જેતપર આંદોલન છાવણી ખાતે નાટક નિહાળવા અને આંદોલનને સમર્થન આપવા માટે રાત્રે હકડેઠઠ મેદની ઉમટી પડી હતી. આ કાર્યક્રમની સૌથી નોંધનીય બાબત એ છે કે, આસપાસના ગામેગામથી બહેનો ખૂબ મોટી સંખ્‍યામાં આ આંદોલનમાં પોતાનો સૂર પુરાવવા માટે ઉમટી પડી હતી. આ નાટકમાં જલ્‍પાબેન વરમોરા અને વર્ષાબેન શીરવી પોતાના સચોટ અભિનય થકી ખેડૂતોની વર્તમાન સ્‍થિતિ, તેમની સમસ્‍યાઓ અને વેદનાને દર્શકો સમક્ષ જીવંત કર્યા હતા. વિશાળ જનમેદની દ્વારા આ નાટકને ભારે પ્રતિસાદ મળ્‍યો હતો. આ કાર્યક્રમમાં ઉમટી પડેલી ભીડ એ સ્‍પષ્ટ સંદેશ હતો કે ખેડૂતોની એકતા અકબંધ છે અને તેમના અવાજને હવે વધુ બુલંદ બનાવવામાં આવી રહ્યો છે.